15. oктобра 2010 в просторах СНМ – Музею русиньской културы на Масаріковій ул. ч. 10 у Пряшові святочна вернісаж выставкы сільскых крoнік і памятных книг. Выставка буде отворена три тыжднї.
Пряшівчане і далшы навщівници Музею русиньской културы можуть ся обознамити з дость детайлнов історіёв многых сіл выходословеньского реґіону. Уможливлює то самобытна выставка сільскых кронік. „Цілём акції є презентація сільскых кронік із выбраных самосправ а посередництвом нёй указаня історії конкретного села, міста а записы в кроніках суть прямым доказом о жывотї конкретных жытелїв. В послїднїм часї записам у кроніках ся не дає достаточна увага, докінця суть села, в котрых кронікы ся ани не пишуть“ – інформовала притомных директорка музею ПгДр. Ольґа Ґлосікова, др. н. У найближшім часї музей буде векшу увагу придїляти роботї з кроніками і планує при музею заложыти Клуб кронікарїв як конзултачный центер, посередництвом котрого ся буде давати методічна поміч кронікарям.
Подля далшого сполуорґанізатора, председы Містной орґанізації Русиньской оброды в Пряшові, ПгДр. Михал Калиняк сільскы кронікы не суть доцїнены. „Їх обсягу, вызнаму і самому посланю не є вытвореный простор, якый собі досправды заслужать. Каждій ґенерації суть моментално єднако далекы. Старшым зістали спомины, молоды творять історію, але нихто з них точно не знає, што з подій, котры прожыли, є записано в кроніках. Зато посередництвом выставкы хочеме приближыти минулость, котра є передана текстами, фотоґрафіями і мапами“ – конштатовав М. Калиняк. Председа Містного одбору Матіцї словеньской у Пряшові, Ладїслав Матіско вірить, же выставка сільскых кронік ся стане традіціов, на котру будуть уж в найближшій будучности надвязовати діскузны клубы о історії нашых сел і їх културнім жывотї.