В юбілейнім роцї 1150-річа од приходу святых братів Кіріла і Мефодія на Велику Моравію пришов ку нам Ёго Преосвященство Варфоломій І., архієпіскоп конштантінопольскый, Нового Рима і екуменічный патріарха.

Патріарху Фарфоломія І. знає цїлый хрістіаньскый світ як першого єрарху православной церькви і екуменічного патріарху. Він ся намагать о выдаваня хрістіаньского свідчіня любви і порозуміня. На цїлім світї є знамый своёв службов при захованю цїлости створїня розвиванём різных актівностей, котры служать к освітї правилного одношіня чоловіка к Богу, ближнёму свому і створїню. Тота навщіва была частёв ослав приятя хрістіаньства славяньскыма народами. При тій нагодї одслужыв святочну Службу Божу 25. мая 2013 у Мікулчіцях на Моравії. На Словакії служыв славностну святу архієреску літурґію 26. мая 2013 в Катедралнім храмі святого Александра Нєвского в Пряшові. Доксолоґію одслужыв 26. мая 2013 у Катедралнім храмі Успенія Пресвятой Богородіцї і святого Яна Милосердного у Кошіцях, а 27. мая 2013 – у Храмі святого Ростислава в Братїславі. Патртіарха Варфоломій І. ся стрітив і з представителями хріатіаньскых церьквей і быв приятый найвысшыма уставныма представителями і членами діпломатічных служеб.