14. новембра 2009 будуть третї вольбы до орґанів самосправных країв на Словеньску a про звышіня участи воличів рїшыла ся пряшівска містна орґанізація Русиньской оброды на Словеньску (РОС) сформуловати добры причіны про правилне рїшіня. Пряшівскый самосправный край є барз важным інштрументом реґіоналного, културного і сполоченьского жывота. Ёго рїшіня формує председа самосправного края і заступительство самосправного края. Подля слов председы Містной орґанізації РОС у Пряшові, Міхала Кальняка: „Русины в Пряшівскім самосправнім краю представляють вызнамну народностну меншыну, котра може выразно овпливнити жывот у найвекшім самосправнім краю на Словеньску. Про ёго 13 окресїв сьме сформуловали 13 причін, котрыма позываме ку волебным урнам.“
З тринадцятёх причін треба спомянути главно тых шість:
1. Высшый теріторіалный цілок формує културу і школство, котры потребуєме про зміцнёваня русиньскых народной ідентічности і захрану історічной дїдовизны.
2. Міджі реґіоналнов і містнов самосправов є партнерство, вдяка Русинам буде і приятельство.
3. Споміджі Русинів можеме зволити авторіты, вдяка котрым ся наш край буде дінамічно розвивати.
4. Русины потребують мати своїх представителїв у веджіню Пряшівского самосправного краю.
5. Вольбов Русинів підпоруєме наш културный, освітный і сполоченьскый жывот.
6. Наш голос в реґіонах мусить быти такый силный, як щіре є наше русиньске чутя.
Віриме, же нашы причіны про участь у реґіоналных вольбах будуть ай причінами вшыткых Русинів у найкрасшім кутику Словакії.