23. авґуста 2009 Высокопреосвященый Ян, архієпіскоп пряшівскый высвятив новый престол у Православній церькви Вознесїня Господнёго в Осаднім, окрес Снина. Высвячіня ся одбыло по оправі іконостасу, котру фінанцовали самы віруючі. Новый престол быв ту потребный, бо тот старый быв значно пошкодженый, а престол є найважнїшов частёв церькви, бо на нім ся выконує Евхарістія і може го высвятити лем єпіскоп.
На святї, котре было по 40 роках, взяло участь православне духовенство і віруючі зо Сниньского і Гуменьского окресу. Ку притомным ся у своїй проподідї приговорив митр. прот. Мґр. Петро Гуменик із Гуменного, котрый подробно высвітлив важность престола і сімболіку каждого кроку при ёго высвячіню. Єдночасно Осаднянам припомянув, абы собі цінили свій храм Божый ёго навщівлёванём і жебы ку тому вели і своїх потомків.
На кінцю архієрейской літурґії, котру своїм співом допроводили віруючі під веджінём канторкы Мґр. Ева Сороковой, Владыкови Янови, притомным і дарцям подяковав парох в Осааднім, прот. ТгДр. Петро Сорока. Перед мированём вшыткых притомных милыма словами поздравив і архієпіскоп Ян.