7. мая 2011 у кіносалї Дому културы у Снинї за притомности пріматора міста Ш. Міловчіка і делеґації Русиньской демократічной партії зо Сримской Мітровіцї у Сербії на челї з єй председом М. Бессерменіём прозвучав силно Голос Русинів сниньской долины, културно-сполоченьска акція перед списованём людей ку 21. маю 2011, орґанізатором котрой была політічна партії Наш край на челї з Л. Кралёвов у сполупрацї зо Здружінем выселенцїв зо стариньской долины у Снинї. У културнім проґрамі той події окрем іншого выступила поетка і співачка М. Ґірова, тріо Яворина, хлопска співацька ґрупа Дукат, духовный хор православной церькви зо Снины і фолклорный колектів Бескид зо Стащіна. Ту была высловлена думка, же недобру сітуацію односно асімілації Русинів мож звернути і тым, же наступаюча молода ґенерація Русинів порозумить, же быти Русином є днесь модерне. Богатство русиньскых предків є невычерпным і одповідностёв наступаючой ґенерації є го хранити і дале розвивати.