18. марца 2011 была на великій сценї Театру А. Духновіча в Пряшові премєра гры Гавай, текст якой написала молода Пряшівчанка Михаела Закутяньска. Тот єй траґікомічный дебут быв уж два раз оцїненый: у конкурзї Драма 2007 і сценарістічнім конкурзї о Цїну Тібора Віхты 2009. Режісерьскы собі гру Гавай взяла під тактовку, і од театру шансу дістала тыж молода режісерка і костімерка (про пєсу зробила окрем режісерьской роботы і костімы) Зоя Зубкова з Братїславы. Інсценація росповідать історію молодого дївчатя Янкы, котра выросла і цїлый свій жывот прожыла в селї Гавай в нетіпічній фамелії з вітцём, малярём з Ужгороду, котрый ся до села приженив і пропав неактівности і алкоголу, як і бабков, няньковов свахов. Янка любов мамы нїґда не зажыла, бо умерла скорше, як бы штось собі могла памятати. Любов не находила ани у нянька, котрый все хотїв сына і зато свою дївку не называв Янка, але Янік. Тоту любов, котра бы єй могла наповнити, не находила ани у свого приятеля Василя, котрому все є переднїшый камарат, як час, котрый бы міг прожыти со своёв милов. Выход Янка з того вшыткого видить по приходї молодого фотоґрафа з Братїславы Гуґа Го, котрый прийшов до Гаваю, жебы захопив жывот Русинів. Рїшыть одыйти з ним з Гаваю і, може ухопити ся шансы просадити свій умелецькый талент ... То є лем фраґмент з обсягу гры.
А зась треба спомянути, же в грї окрім освідченых старшых герців тыж дістали шансу молоды: Славка Шмайдова, Владимір Ільканін. Сценічну музику зась обробила молода піаністка Луція Хутькова. Так русиньскый театер у повній мірї дав шансу молодым – молодым творцям і молодым герцям. А они ся той шансы хопили скоро стопроцентово і надіяєме ся, же в такім трендї ТАД буде продовжовати і в будучности.