Новинкы • Noviny • News 14/2011

• Великодны традіції Русинів

  31. марца 2011 у формі выставкы СНМ – Mузей русиньской културы у своїх просторах на Масаріковій 10 в Пряшові представив трaдіції Русинів на Словеньску почас Великодных свят, зачавши приправов великодных їдел, столованём і продовжуючі звыками, набоженьскыма обрядами, якы споєны з тым періодом.

• Презентація філму в Кошіцях

  27. марца 2011 у Клубі народностных меншын у Кошіцях на Мясярьскій 35 Містна орґанізація Русиньской оброды на Словеньску зорґанізовала презентацію філму Осиф і ёго братя – документ о гіркім скламаню тых, котры по 2. світовій войнї під впливом пропаґанды переселили ся на Україну за видинов лїпшого жывота.

• Бесїда з Дж. Ріґеттім у МРК

  22. марца 2011 у сполупрацї з Клубом Русинів Словеньска СНМ – Музей русиньской културы у своїй засїдалнї на Maсаріковій 10 у Пряшові приправив бeсїду з лідром Русинів Северной Америкы – Джоном Ріґеттім, презідентом Общества карпатьскых Русинів із центром в Піттсбурґу нa тему Жывот і актівности Русинів у США.

• Засїданя СРР на Українї

  19. – 21. марца 2011 одбыло ся на Українї семе поконґресове засїданя Світовой рады Русинів. Засїданя мало конштруктівный характер і мож го роздїлити до 4 частей: 1. окреме їднаня членів СРР у Сваляві, 2. навщіва русиньскых недїльных школ на годинах русиньского языка в Сваляві, 3. робоча стріча з ґубернатором Мукачева Александром Ледідом, 4. навщіва Києва.

• Гра Гавай – шанса про молодых

  18. марца 2011 была на великій сценї Театру А. Духновіча в Пряшові премєра гры Гавай, текст якой написала молода Пряшівчанка Михаела Закутяньска. Тот єй траґікомічный дебут быв уж два раз оцїненый: у конкурзї Драма 2007 і сценарістічнім конкурзї о Цїну Тібора Віхты 2009. Режісерьскы собі гру Гавай взяла під тактовку, і од театру шансу дістала тыж молода режісерка і костімерка (про пєсу зробила окрем режісерьской роботы і костімы) Зоя Зубкова з Братїславы.

• Стріча молодых Русинів у Кошіцях

  17. марца 2011 многы члены орґанізації Молоды.Русины ся переправила з Братїславы до Кошіць, де ся одбыла їх стріча, на котрій ся хотїли лїпше спознати і веце спропаґовати русиньску културу в другім найвекшім містї на Словеньску.