14. мая 2011 у Театрї Александра Духновіча в Пряшові одбыла ся громадна стрїча членів Общества св. Йоана Крестителя. По вступнім співі і грї на акордеонї Мартіна Караша і Іваны Сивульковой, молитві, привітаню участників, прочітаню куртой історії обновленого Общества (опублікуєме в 3. чіслї часопису Русин) ёго председом о. Ярославом Поповцём, із рефератом на тему А. Духновіч, А. Добряньскый і єпіскоп П. П. Ґойдіч і їх одношіня ку ґрекокатоликам-Русинам выступив о. Мілан Ясик (опублікуєме в 3. чіслї часопису Русин). Потім к списованю людей (публікуєме в тім чіслї новинок) выступив о. ТгЛіц. Франтїшек Крайняк, а о актівітах Общества (публікуєме в тім чіслї новинок) росповів ёго підпредседа о. Владимір Лапігуска. На громадї з поздравныма словами выступили позваны гостї: председа Словеньской асоціації русиньскых орґанізацій Александер Зозуляк (публікуєме в тім чіслї новинок), бывшый председа Окресной орґанізації Русиньской оброды у Свіднику Ян Калиняк, председа новоствореного Клубу Русинів Словеньска Славомір Гиряк і ряд іншых. Дале выступали і членове Общества, а в културнім проґрамі окрем М. Караша і І. Сивульковой ся представила ґрупа співачок із камюньского фолклорного колектіву Барвінок.
Была то перша стрїча такого характеру в новодобій історії Общества св. Йоана Крестителя, котра была добрї зорґанізована і была цїнным вкладом до актівностей у русиньскім русї перед списованём людей к 21. маю 2011.