19. februára 2010 Ініціатівна ґрупа Русинів, котра боює за вернутя Руського дому в центрї Пряшова, свої пожадавкы демонштратівным способом декларовала перед будовов на Главній уліцї ч. 62. Як увів знамый карікатуріста Федор Віцо, Руськый дом узурповало сі троє людей, котры до нёго не пускають членів русиньскых орґанізацій. На знак несугласу з теперішнїм ставом запалили свічкы перед будовов і прочітали выголошіня, котре участници протестного згромаждїня прямо на уліцї підпорили своїма підписами.
Віцо інформовав, же Руськый дом быв купленый 1925 року з народной фінанчной збіркы і зато мать служыти і днесь потребам вшыткых русиньскых орґанізацій. Твердить, же в роцї 2006 тот маєток подводным способом перешов до надації а з маєтком высокой цїны днесь маніпулує троє людей без будьякой контролї. Подля Віца ку подводу дошло так, же узка ґрупочка людей приложыла підписы з нормалной членьской громады Руськый клуб – 1923 під закладательску листину Надації Руськый клуб 1923 і без знаня членів здружіня ю дали зареґістровати. Під надацію потім перевали будову Руського дому а одтогды свойвольно ю выужывать троє людей. Дїло є на Окреснім судї в Пряшові, де ся припад вернув з крайского суду а доднесь не быв встановленый термін засїданя суду.
Подля Петра Крайняка, мол., котрый є єдным із актівных членів Ініціатівной ґрупы Русинів за захрану Руського дому, зачатком фебруара їх члены послали Отворене писмо міністрові внутра СР, Робертови Калинякови, жебы перевірив діятельство надації. Сіґнатарї писма в нім упозорнюють на злу роботу судів, прокуратуры і поліції, котры подля них злигали і в тім дїлї не діють. Публічне выступлїня неспокійных Русинів ся конало з подобным сценаром так, як перед року в тым самім часї. Ёго орґанізаторы хотїли указати на то, же ани по роцї проблем Руського дому ся не рушыв з місця. Председа Надації Руського клубу 1923 Штефан Секерак про аґентуру „SITA“ повів, же вшыткы напады суть неправдивы і буде на них реаґовати на будучій тыждень у своїм выголошіню. Подля ёго тверджіня, до будовы Руського дому Русины мають приступ, але не такы, як Федор Віцо і подобны, „котры русиньскый хлїб їдять, але давно го зрадили.“