Новинкы • Noviny • News 8/2010

• Далшый протест перед Руськым домом у Пряшові

  19. februára 2010 Ініціатівна ґрупа Русинів, котра боює за вернутя Руського дому в центрї Пряшова, свої пожадавкы демонштратівным способом декларовала перед будовов на Главній уліцї ч. 62. Як увів знамый карікатуріста Федор Віцо, Руськый дом узурповало сі троє людей, котры до нёго не пускають членів русиньскых орґанізацій. На знак несугласу з теперішнїм ставом запалили свічкы перед будовов і прочітали выголошіня, котре участници протестного згромаждїня прямо на уліцї підпорили своїма підписами.

• „Конференція“ і бал – велике фіаско!

  12. фебруара 2010 у Пряшові в конґресовій залї готела Дукла одбыла ся конференція, котра мала мати міджінародный характер і яка была присвячена емерітному єпіскопови, Монс. Янови Гіркови, як чоловікови зо „щірым“ одношінём ку Русинам. Уж перед конференціов і тоты незаінтзересованы ся парадоксно інтересовали о тім, в якім дусї і чом є властно конференція такого міджінародного характеру орґанізована і присвячена праві Монс. Янови Гіркови, котрого векшына русиньскых ґрекокатолицькых віруючіх внимати неґатівно. Він нелем же не вырїшыв русиньску проблематіку в рамках ґрекокатолицькой церькви, але праві наопак – быв ініціатором словакізації в тій церькви.

• Образ А. Варгола – за высше 3,5 міліона $

  11. фебруара 2010 в Лондінї зреалізовала світова аукчна сполочность Хрістіс дражбу творів повойнового і сучасного вытварного уменя. Міджі НАЙ выдраженыма творами быв і Варголїв „Dollar Sign“ (Підписаный долар), котрый із выволаваючой цїны 1,8 міліона америцькых доларів наконець быв выдраженый за суму 3.558,750 доларів без 17-перцентной продажной премії.