12. фебруара 2010 у Пряшові в конґресовій залї готела Дукла одбыла ся конференція, котра мала мати міджінародный характер і яка была присвячена емерітному єпіскопови, Монс. Янови Гіркови, як чоловікови зо „щірым“ одношінём ку Русинам. Уж перед конференціов і тоты незаінтзересованы ся парадоксно інтересовали о тім, в якім дусї і чом є властно конференція такого міджінародного характеру орґанізована і присвячена праві Монс. Янови Гіркови, котрого векшына русиньскых ґрекокатолицькых віруючіх внимати неґатівно. Він нелемже не вырїшыв русиньску проблематіку в рамках ґрекокатолицькой церькви, але праві наопак – быв ініціатором словакізації в тій церькви.
Много Русинів давать за кривду в словакізації обрядів у ґрекокатолицькій церькви сучасному владикови Янови Бабякови, але він лем „наступив до влаку“, котрый розбігнув Монс. Гірка в минулости. Много участників конференції ся надіяло, же конференція буде одповідёв на факты з історії, котры нихто не може вывернути а ани свойвольно інтерпретовати. Но не стало ся так. Конференція была великым шкандалом, але главно ганьбов про нас Русинів. Взяло на ній участь „аж“ 20 людей а ку міджінародному характеру мала барз далеко. Была необєктівна а участь на акції не взяли жадны представителї русиньскых орґанізацій, котры в русиньскім руху роблять уж довгы рокы.
Найвекшым фіаском было, же на конференції не брали участь ани ґрекокатолицькы священици, про котрых особа Монс. Гіркы бы мала быти неодїлнов частёв їх душпастырьского жывота.
Тота інформація не мать за ціль оцїнёвати особу монс. Гіркы, але скорше є на задуманя, ці была хосенна про орґанізаторів акції, членів не так давно взникнутой орґанізації Здружіня Русинів Словеньска, котрой председом є Мґр. Растіслав Зима, якы не мають нияке моралне право заступати вшыткых Русинів Словеньска в такых чутливых темах, як і дяковати Монс. Гіркови в менї вшыткых Русинів!!!
Бо окрем высше уведженой орґанізації жадна інша русиньска орґанізація не партіціповала на тій конференції. Вшыткым Русинам є надміру ясно, же Монс. Гірка про них не зробив абсолутно ніч. То суть історічны факты, котры не можуть вывернути ани самы орґанізаторы акції. Незналость, нескусеность і необєктівность орґанізаторів завели Русинів на таку періферію, же суть теперь ганьбов і на сміх словеньскому жытельству, главно в пряшівскій области.
Далшов „выдаренов“ акціов быв 1. Міджінародный русиньскый бал, котрый ся одбыв 13. фебруара 2010 тыж в готелї Дукла. Перед тым як зробив собі велику рекламу, так і наславно скінчів, бо окрем іншого на нім было „аж“ 40 участників, з того 20 выступаючіх. Пусто было главно зато, же ся Русины дізнали, чом ся, або на честь кого ся орґанізує. Несерёзный быв і єден з такых прикладів, же першов цїнов у томболї было авто Шевролетт, а хто бы за пар дрібных не хотїв выграти авто?! Але яке было скламаня, кідь вітяз ся дізнав, же тото авто выграв лем на вікенд… Также і такый поступ Здружіня Русинів Словеньска псує імідж Русинів міста Пряшів. (Поз. ред.: Бо, наприклад, орґанізатор Світовый конґрес Русинів минулого року дав до злосованя листкы на бал, з тым, же вітяз здобуде червене авто Шкода Фабія, а так ся і стало. Щастлива жена ся на ним возить доднесь.)
Наконець є треба підкреслити, же Здружіня Русинів Словеньска є лем недавно заложенов орґанізаціов, котра без будьякой сполупраці і порады з одборниками, як і екзістуючіма скусеныма орґанізаторами приправили „міджінародну одборну конференцію“ і „1. Міджінародный русиньскый бал“, котры были дослова высміхом Русинів. Задумайме ся, ці така форма інтеґрує і приспівать ку далшом у возроджуючому процесу Русинів нелем на Словакії, але і у світї.

-лс-

здрой:www.rusyn.sk