22. мая 2011 в містї Ґёдёллё прошло святкованя Дня Русинів у Мадярьску, котре приправила Вседержавна русиньска самосправа під покровительством Чабу Латорцая з Міністерства верейной справы і справедливости Мадярьской републікы. Проґрам акції зачав св. літурґіов у церьковнославяньскім языку за участь дакількох священиків, яку допроводжав спів хору св. Ефрема під веджінём діріґента Др. Томаша Бубна. Акція дале продовжовала бесідов із представителями оддїлїня народностей споминаного міністрства і Вседержавной русиньской самосправы на челї з Віров Ґіріц. Пізніше спомянута вєдно з председом Вседержавного общества русиньской інтеліґенції Антонія Годинкы в Мадярьску проф. Др. Антоніом Лявинцём передавала Премії А. Годинкы. Мадярьске святкованя Дня Русинів завершыло ся святочным концертом школярів із русиньскых меншыновых културных центрів і женьскых хорів із русиньскых реґіонів.