Новинкы • Noviny • News 22/2011

• Закон перешов в оклїщеній подобі

  25. мая 2011 Нарoдна рaдa СР у Братїславі голосами 78 посланцїв схвалила нoвeлу закона o пoужываню языків народностных меншын. Список вецеязычных сел ся до року 2021 не росшырить, а то і наперек тому, же од юла 2011 законне кворум ся знижыть з 20 нa 15 процент. Нa другім боцї коаліція ся по довгых рокованях догодла, же до року 2031 нияке село не страть вецеязычный статус. Выпливать то з новелы закона.

• Новела знижыла языкове кворум

  Тема списованя людей ґрадує в медіях Словеньска. Тїшыть нас, же слово „Русин“ часто резонує в інформаціях о списованю. Резонує і зато, бо новоприятый закон знижыв языкове кворум про народностны мeншыны з 20 на 15 процент. Тогды назву села по русиньскы азбуков в будучности бы не мало лем 68 нашых сел, як є теперїшній став, но аж 113, а то подля штатістікы списованя людей з р. 2001. То значіть, же по списованю людей того року бы то могло быти іщі высше чісло як 113.

• 16. семінарь карпаторусиністікы

  25. мая 2011 у засїдалнї Consilium minus нового Ректорату Пряшівской універзіты на ул. 17. новембра 1 быв 16. Научный семінарь карпаторусиністікы, в рамках якого з рефератом на тему Формованя і розвой модерных русиньскых списовных мікроязыків выступив професор Нїредьгазькой высшой школы (Мадярьско) Др. Михал Капраль, к. н. Семінарь приправив Інштітут русиньского языка і културы Пряшівской універзіты в Пряшові.

• День Русинів у Мадярьску

  22. мая 2011 в містї Ґёдёллё прошло святкованя Дня Русинів у Мадярьску, котре приправила Вседержавна русиньска самосправа під покровительством Чабу Латорцая з Міністерства верейной справы і справедливости Мадярьской републікы.

• Презентація енціклопедії о Русинах

  5. мая 2011 у Націоналній історічній бібліотецї Україны в Києві в рамках Днів славяньской културы при чісленній громадї научных працовників, штудентів, представителїв діпломатічных місій і под. одбыла ся презентація україньского перекладу унікатного канадьского выданя «The Encyclopedia of Rusyn History and Culture» в редакції Павла Роберта Маґочія і Івана Попа.