25. мая 2011 у засїдалнї Consilium minus нового Ректорату Пряшівской універзіты на ул. 17. новембра 1 быв 16. Научный семінарь карпаторусиністікы, в рамках якого з рефератом на тему Формованя і розвой модерных русиньскых списовных мікроязыків выступив професор Нїредьгазькой высшой школы (Мадярьско) Др. Михал Капраль, к. н. Семінарь приправив Інштітут русиньского языка і културы Пряшівской універзіты в Пряшові. Спершу, як бывать звыком, директорка Інштітуту доц. ПгДр. А. Плїшкова, ПгД. привітала вшыткых притомных і представила гостя, прочітавши ёго біоґрафію і найвызнамнїшы вчінкы у сфері карпаторусиністікы. По выступлїню М. Капраля в діскусії выступили: Мґр. Ґ. Бескид, проф. ПгДр. Ю. Дудашова, др. н., Ш. Крушко і Інж. Д. Крішко. В проґрамі семінаря была і презентація найновшых выдань з карпаторусиністікы, главно выдань научных працовників із Нїредьгазы: небогого проф. Іштвана Удварія і проф. М. Капраля, котры зробила асістентка Інштітуту ПгДр. К. Копорова. Нас потїшыв главно перед тыжднём выданый букварь про русиньскых школярів у Мадярьску як єдна з публікацію готованой кодіфікації мадярьской верзії русиньскопго списовного языка.

Фоткы: А. З.