5. мая 2011 у Націоналній історічній бібліотецї Україны в Києві в рамках Днів славяньской културы при чісленній громадї научных працовників, штудентів, представителїв діпломатічных місій і под. одбыла ся презентація україньского перекладу унікатного канадьского выданя «The Encyclopedia of Rusyn History and Culture» в редакції Павла Роберта Маґочія і Івана ПопaПопа («University of Toronto Press», 2005). Україньска верзія енціклопедії під назвов «Енциклопедія історії та культури карпатських русинів» недавно узріла світло світа в Ужгородї («Видавництво В. Падяка», 2010) накладом 1 500 примірників.
Участь на презентації взяли зоставителї і выдавателї того енціклопедічного выданя, якы спеціално пришли до Києва. Міджі нима: головный редактор выданя, професор Торонтьской універзіты П. Р. Маґочі, автор перекладу Надія Кушко (Торонто), директор ужгородьского выдавательства Валерій Падяк, к. н., головный редактор выдавательства Лариса Ільченко і спонзор выданя, канадьскый філантроп русиньского походжіня Штефан Чепа. В обговорїню книгы взяли участь тыж: ведуча оддїлїня Інштітуту історії Україны НАН Україны професор Степан Віднянскый, доктор історічных наук, вызнамный сполупрацовник Націоналного іныштитуту українознательства, професор Валентіна Борисенко, доктор історічных наук, учітель Колумбійской універзіты у Ню-Йоркы, доктор Серґей Біленькый а іншы. Презентацію своїм выступов у културнім проґрамі збогатив прекрасный фолклорный ансамбель русиньскых недїльных школ Підкарпатя Бабчіна співанка (умелецькый ведучій: народна русиньска співачка Ольґа Прокоп).
Того істого дня зоставителї і выдавателї енціклопедії абсолвовали дакілько презентачных стрїч у Києві. Головно одбула ся стрїча з омбудсманков Україны Нїнов Карпачовов. Почас стрїчі делеґація поінформовала омбудсманку о данім выданю, котра собі взяла за цїль помочі при уведжіню до научной сферы обьєктівной, научно вываженой інформації о історії і културї, сучаснім ставі карпатьскых Русинів, заінтересовлёвати до того україньску і русиньску научну еліту, включно молодежи, глубше скумати проблемы карпатьскых Русинів на Українї, у т. ч. на основі презентованой енціклопедії, што може значно помочі офіціалному узнаню на Українї націоналности „Русин”. Зо свого боку Н. Карпачова поінформовала делеґацію о приправі свого поданя до презідента Україны Віктора Януковича з нагоды офіцілного узнаня русиньской націоналности на Українї. (На стрічі быв притомный і конзултант омбудсмана про Підкарпатя Василь Кузё і представитель повіреный председом Карпаторусиньского общества з центром Піттсбурґу Славомір Гиряк).
Была тыж стрїча в Інштітутї історії Україны Націоналной академії наук Україны. Почас стрїчі делеґація росповіла о резултатах своёй роботы над выданём той унікатной русиньской енціклопедії і передала єден екземлярьла «Енциклопедії історії та культури карпатських русинів» директорови Інштітуту, академікови НАН Україны Валеріёви Смоліёви.