Десять початковых років в жывотї чоловіка не є много – є то іщі все лем дїтиньскый вік. Но многы учены суть того нагляду, же праві першы рокы жывота суть про розвиваня чоловіка найголовнїшы, а што в них чоловік набуде, то наповно схоснує в далшых роках жывота.

Десять років в жывотї Общества св. Йоана Крестителя (дале ОСЙК) не є много, но по обгляднутю ся до минулого, были то рокы уроджайны, повны духовного їдла. Свідчать о тїм друкованы Артосы і Календарі, но і реліґійны дїла (Требник, Молебен, Акафіст, Тетраєвангеліє...) , котры міцно обогачують духовный жывот вірників. А вірю, же тото цїнне богатство ся не закопать до землї, но буде роздаване вшыткым Русинам.

Початкы Общества ся вяжуть на рік 2003. Тогды намісто одходившого пряшівского єпіскопа Йоана Гіркы на єпіскопскый столець наступує єпіскоп Йоан Бабяк, СІ. Ёму было русиньскыма ґрекокатолицькыма священиками заслане 6. авґуста 2003 р. пожаданя на обновлїня ОСЙК. Пишу на обновлїня а не на основаня, бо уж в р. 1862 за єпіскопа Йосифа Ґаґанця было тото Общество основане а жыво дїяло 12 років. Владыка Йоан Бабяк потвердив становы 19.12. 2003 р. а Міністерство културы СР го офіціялно зареґістровало 11. 2. 2004 р. Перше засїданя Общества в Міджілабірцях зачало Молебеном ку Пр. Богородицї 16.мая 2004 р. о 16.00 год. на лабірскій ґр. кат.фарї. По молитві были вольбы. За председу быв зволеный о. Ярослав Поповець, за підпредседу о. Владимір Лапігуска, а за господаря о. Мілан Ясик. Далшыма членами выбору ся стали: о. Франтїшек Крайняк, о. Владимір Панчак, о. Іґор Панчак, о. Радослав Вацё і о. Мартін Костїлник. Міджі першы пункты проґраму ОСЙК належали тоты:
1. Стріча з владыком Йоаном Бабяком.
2. Выдаваня Ґр. кат. русиньского календаря.
3. Выдаваня часопису Артос.
4. Здобытя новых членів Общества.
5. Выданя Крестной дорогы, Акафісту ку бл. П. П. Ґойдїчови, Молебена ку блаж. В. Гопкови.

К днешнёму дню Общество рахує высше 550 членів а в русиньскім літературнїм языку выдало Погріб-Парастас, Духовны піснї, Тетраєвангеліє, Малый требник. Перекладательскый тім Общества заслав на Архієпіскопство в Пряшові на імпріматур Молитвеник і Літурґію св. Йоана Златоустого.
Дїло Общества Господь Бог благословить через молитвы і дары нашых членїв і сімпатізантїв. Уж 10 років є ОСЙК про них і за них.

Тыма вшыткыма актівітами хоче ОСЙК помочі духовному взростаню русиньскых віруючіх а посмилити гієрархію Ґрекокатолицькой і Православной Церькви, жебы ся не бояла прияти міджі остатнї літурґічны языкы і русиньскый язык а рівноцінно го хосновати про духовне добро своїх вірників.