24. юла 2011в Камюнцї (Старолюбовняньскый окрес) одбыли ся Днї звыків і традіцій села Камюнка в рамках цілословеньского проєкту Русиньской оброды на Словеньску – Днї русиньскых традіцій. Тота акція є ефектівнов формов пропаґації петред списованём жытельства в роції 2011 на Словеньску, бо скоро вшытко было русиньске – слово, музика, літурґія, пропаґація і модерованя.

Як традічно акція ся зачала церьковнославяньсков святов літурґіов у міствній Церькви св. Петра і Павла, котру вів о. Франтїшек Крайняк. Подля многых участників богослужбу о. Крайняк вів так, же і тот найвекшый „незнатель“ русинства мусів порозуміти, же ся находить на чісто русиньскій Службі Божій. Потім ся одбыла презентація народных кроїв Русинів і іншых народностей, народных ремесел, русиньской літератруры а участны собі припомянули і 15. років од смерти Штефана Біттнера. По пєтнім актї при містнім памятнику павшым воякам зачав тройгодиновый богатый ґалапроґрам – Русиньскый бал, в котрім, окрім іншых, выступили: дуо Василенко – Блыха з Орликы, дуо сестер Маньковых-Вахтаровых із Старой Любовнї, успішна лемківска співачка Юлія Десна з Польска, ФК Ястрабчан із Шаріського Ястрабя, співачка Андрейка Тімочкова, СҐ Єднота пензістів із Камюнкы, успішный домашній ФК Барвінок і іншы. Заінтересовали і выступы декламаторів, модератоірів і функціонарїв, Єдным словом было ся на што позерати і што обдивляти. А на кінець за добрый сценарь і режію треба подяковати Мартінови Карашови, председови МО РОС у Камюнцї, членови КВ РОС і председови СФРМ.