9. новембра 2013 у Словеньскій републіцї ся одбыли вольбы до орґанів самосправных країв, у тым чіслї і до пряшівского, де жыє найвеце Русинів у рамках Словеньска. Нас потїшыв як тот выслїдок, кідь уж того дня у вольбах жыпанів, то є в першім колї, выграв староновый жупан-Русин МУДр. Петро Худік, так і то, же было зволено высше єдной шестины посланцїв з русиньскыма корїнями з 62-членного заступительства Пряшівского самосправного краю. А як ся звыкло говорити, молоды у нас мають всягды дверї одкрыты (?!), а то і в комуналній політіцї, де праві тот наймолодшый посланець-Русин Мґр. Петро Крайняк із Пряшова здобыв найвеце голосів у своїм 7. волебнім раёнї, кідь за нёго голосовало 4 717 волічів (міджі іншым, у тых вольбах за ним заостав о 16 голосів і сучасный пріматор Пряшова – ЮДр. Павел Гадярі). Окрем П. Худіка і П. Крайняка, были зволены і далшы Русины, котрых знаєме і якы ся голосять ку своїм русиньскым корінём, не ганьблять ся голосити к Русинам. Реч іде, наприклад, о Іванови Гоптови з Гуменного, Адріянові Калинякови з Міджілаборець, Янови Голінкови з Уліча, Надеждї Сірковій з Ублї, Михалови Лукшови зо Снины, Петрови Піпліпови і Міланови Цоцулёви зо Свідника. Але были зволены і такы, котры мають русиньске походжіня, але не признають ся ку тому, або, докінця, ся за то ганьблять. Шкода? Так бы сьме могли говорити не о восьмох посланцях і жупанови, якы суть Русины, але і о далшых. Можно іщі дозріють до Русинів(?!). Тадь каждый знать, же Пряшівскый самосправный край, главно ёго северовыходны части суть дость густо заселены Русимами. І так ґратулуєме вшыткым Русинам – сучасным і „будучім –, котры были зволены, же про свій русиньскый народ і дашто хосенного зроблять на полї комуналной політікы, не же цїлый волебный період пересидять нечінно у лавках пряшівского парламенту. Хотїло бы ся вірити, же так тому не буде, і остатны Русины одчують їх голос і конкретны дїла в одношіню до Русинів, до чого їм желаме міцне здравя, щастливе родинне оточіня і не єден успіх у роботї, але і на хосен Русинів. Русины помагайте Русинам так, як то роблять, наприклад, Мадяре на Словеньску міджі собов.