18. нoвeмбрa 2009 в засїдалнї Музею русиньской културы на Масаріковій уліцї ч. 10 в Пряшові одбыло ся засїданя росшыреной Рады СРПС.
На нїм была проаналізована реалізація задач СРПС в роцї 2009 председом сполку, ПгДр. Миколаём Ксеняком, подана інформація о літературнім конкурзї в роцї 2009 председом пороты конкурзу, Ярославом Сисаком, оцінїня творів приголошеных до конкурзу. Потім наслїдовала діскузія, прочітаны были конкурзны крітерії на рік 2010 а завершінём акції была презентація трёх книжок выданых сполком у роцї 2009, а то Миколая Ксеняка Жменї родной землї, Штефана Смолея Нагода або судьба і Русиньскый літературный алманах на 2010 рік. Што є інтересне, же першу зо споминаных книжок „хрестили“ землёв із авторовой родной Камюнкы а Смолеёву книжкы – частов потравов Русинів у минулости – татарков. На фотцї: (злїва) директорка споминаного музею ПгДр. Ольґа Ґлосікова, др. н., і доц. ПгДр. Василь Хома, к. н., як „хрестять“ публікацію Ксеняка, дале за челным столом сидять Я. Сисак і М. Ксеняк.