Новинкы • Noviny • News 22/2009

• Засїданя росшыреной Рады СРПС

  18. нoвeмбрa 2009 в засїдалнї Музею русиньской културы на Масаріковій уліцї ч. 10 в Пряшові одбыло ся засїданя росшыреной Рады СРПС. На нїм была і презентація трёх книжок выданых сполком у роцї 2009, а то Миколая Ксеняка Жменї родной землї, Штефана Смолея Нагода або судьба і Русиньскый літературный алманах на 2010 рік.

• Першый – про высокы школы

  16. новембра 2009 быв (скоро сімболічно – в переддень 20-річа нїжной револуції, котра зачала ренесанс русинства і Русинів у нашій отчізнї) выданый першый высокошкольскый учебник русиньского языка про штудентів штудійного проґраму русиньскый язык і література на Пряшівскій універзітї. Авторами учебника суть доц. ПгДр. Василь Ябур, к .н., і ПгДр. Анна Плїшкова, ПгД., рецензентами – проф. Др. Стефан Пю і проф. Др. Михаил Капраль, к. н, языкову управу зробив доц. ПгДр. Василь Ябур, к. н.

• Вольбы і Русины

  14. новембра 2009 у вшыткых самосправных краях Словеньской републікы были вольбы до їх заступительств. Нас інтересує Пряшівскый самосправый край (ПСК), бо ту жыє векшына Русинів Словакії. До пряшівского крайского парламенту ся дістали і Русины, а то Іван Солей за обвод Міджілабірцї, Мілан Цоцуля і Ян Голодняк за обвод Свідник, Надєжда Сіркова за обвод Снина. Вшыткым тым ґратулуєме і віриме, же при рїшаню културно-народностных проблемів у парламентї не забудуть на то, же суть Русинами. Мерзить нас, же за обвод Пряшів ся до заступительства ПСК не дістав нихто з Русинів, хоць кандідовали, наприклад, Федор Віцо, Інж. арх. Славомір Гиряк, Маріо Ґарбера ці Мґр. Петро Крайняк, або за обвод Снина – Бц. Крістіан Гуняра.