18. юна 2009 р. у Пряшові, в Театрї Александра Духновіча (мала сцена) была членьска громада Містной орґанізації Русиньской оброды в Пряшові, яка застрїшує своїх членів у Пряшові і Сабінові. На нїй была в першім рядї оцінена дотеперїшня робота МО РОС в Пряшові а по дінамічній діскузії, де доміновав проблем Руського дому в Пряшові, одбыли ся вольбы.

Быв зволеный новый председа орґанізації, якым ся став родак із Міджілаборець – ПгДр. Михал Калиняк. Так істо быв зволеный девятьчленный выконный выбор МО РОС, у якім суть: Михал Калиняк, Федор Віцо (стояц на челї МО РОС у Пряшові од 2007 року і здінамізовав єй роботу), Василь Янко, Сілвія Лысинова, Димітрій Крішко, Петро Крайняк, мол., Владимір Чема і Осиф Орловскый. Зміна в МО РОС у Пряшові бы мала припомочі к іщі бівшій ефектівности роботы пряшівскых і сабіновскых Русинів перед списованём людей у 2011 роцї, што підкреслив і єй новозволеный председа Михал Калиняк.