19. юла 2009 учнї Основной умелецькой школы Александра Любимова у Міджілабірцях під веджінём директоркы школы Мґр. Людмілы Штецовой приправили проґрам музикы, співу і умелецького слова, за помочі котрых представили публіцї особность леґендарного князя Лаборця, владаря карпатьскых Русинів, котрый быв заятый старомадярьскыма войсками праві у просторї днешнїх Міджілаборець і прямо над ріков Лаборець быв завішеный. Як ріка, так і місто дістали по владарёви своє мено. То іншпіровало школярїв представити далшу вызнамну особность в залї дому културы в рамках 3. річника проєкту Великы Русины, котрый теперь нїс назву Князь Лаборець і Міджілабірцї. Културный проґрам, окрем 40 школярїв і їх родичів, збогатив русинськым співанками і домашній фоклорный колектів Камяна.