Новинкы • Noviny • News 6/2009

• Архієрейскый одпуст на Буковій Гірцї

  1. – 2. авґуста 2009 быв ахієрейскый одпуст – Преображеніє Господа на Буковій Гірцї, Стропківского окресу, якый мать довгорічну традіцію.

• Юбілей села Жаківцї

  25. – 26. юла 2009 у Жаківцях, окрес Кежмарок, де были выстягованы жытелї сусїднёго русиньского села Блажів внаслїдку будованя воєньского пасма, ославлёвали 800 років села.

• Князь Лаборець у Міджілабірцях

  19. юла 2009 учнї Основной умелецькой школы Александра Любимова у Міджілабірцях під веджінём директоркы школы Мґр. Людмілы Штецовой приправили проґрам музикы, співу і умелецького слова, за помочі котрых представили публіцї особность леґендарного князя Лаборця, владаря карпатьскых Русинів, котрый быв заятый старомадярьскыма войсками праві у просторї днешнїх Міджілаборець і прямо над ріков Лаборець быв завішеный. Як ріка, так і місто дістали по владарёви своє мено.

• День културы в Кленовій

  19. юла 2009 было Свято културы у Кленовій, Сниньского окресу, в рамках котрого у богатім културнім проґрамі выступили: музична ґрупа Яна Маґуры, женьскы співацькы колектівы Старинчанта, Кленівчанка і Дуга, вокално-інштрументална ґрупа Дукат і Николай Петрашовскый, але не хыбовало ани гуморне слово в інтерпретації народного росповідача Йожкы Йожка. Шестый річник свята у Кленовій быв успішный і богатый, наперек тому, же в селї ся в сучасности робить реконштрукція основной школы, што буде стояти 370 тісяч евр.