30. юна 2010 в салонику їдалнї высокошкольского інтернату Пряшівской універзіты быв Літературный вечур як єдна з доповнюючіх акцій І. Міджінародной лїтнёй школы русиньского языка і културы (Studium Carpato-Ruthenorum, 14. 6. – 4. 7. 2010).
Приємне посиджіня в коморній атмосферї мала під патронатом авторка проєкту лїтнёй школы, літераторка і асістентка Інштітуту русиньского языка і културы Мґр. Алена Блыхова, котра была заєдно і модераторков цїлого вечора. Нашым краянам споза граніць были представлены найвызначнїшы писателї русиньской літературы, переважно зо Словеньска, участь прияв і взацный гость з Польщі – писатель Петро Трохановскый-Мурянка. Русиньску літературу на Словеньску представляли Марія Мальцовска, Штефан Сухый і Осиф Кудзей. Шкода, же позваня зо здравотных прічін не міг акцептовати і Миколай Ксеняк, бо тым бы было завершене квартето русиньскых писателїв зо Словеньска, котры дотеперь были оцїнены престижнов Преміов А. Духновіча за русинську літературу. Але тота інформація была притомным одгалена аж на кінцю вечора, котрый кулміновав якраз переданём Премії А. Духновіча за рік 2010 панови Осифови Кудзеёви з Няґова. Премію, „русиньского Оскара“, котру спонзорує Штефан Чепа з Торонта, і удїлює Карпаторусиньскый научный центер в США, передали проф. Павел Роберт Маґочій і проф. Патріція Крафчік. Также, як сконштатовала модераторка вечора: „ ... за столом уж сидять русиньскы писателї – вшыткы лавреаты Премії А. Духновіча за русиньску літературу.“ Можеме лем доповнити, же прім у чіслї лавреатів мають словеньскы Русины, бо зо Словеньска то быв уж четвертый оцїненый – позад Марії Мальцовской, Штефана Сухого і Миколая Ксеняка. А же тото оцїнїня было передане досправды тым найлїпшым, то нам вшыткы лавреаты доказали презентаціов своїх творів, а нелем декламованём, бо дакотрых з них судьба обдарила і другыма цїнныма дарами. Петро Трохановскый-Мурянка з недалекой Крыницї на властну, але і поезію другых авторів компонує і музику, также было радость послухати ёго прекрасный спів. В тім одношіню ся не дав заганьбити ани свіжый лавреат пан Осиф Кудзей, котрый пришов з цїлым своїм „фан-клубом“ Няґівчан. Многы притомны на вечорї ся не стримали слыз, кідь тріо Осиф Кудзей, Серґей Сметанка (староста Няґова) і о. Ян Блашко (священик з Міджілаборець) заспівало пару фраґментів з Акафісту священомученикови Павлови Петрови Ґойдічови, котрого автором є праві Осиф Кудзей, звізда літературного вечора. Пане Осифе Кудзею, вшыткы Вам тоту славу од щірого сердця жычіме. Вказали сьте нашым краянам, же мають быти на што горды. Представили сьте дїдовизну їх предків неповторным способом. Ваша харізма ся дотулила нас вшыткых – участників того незабытного вечора.