11. мая 2011 в Закарпатьскій областній універзалній научній бібліотецї одбыла ся презентація новой україноязычной „Енциклопедії історії та культури карпатських Русинів“ (2010). Toго самого дня головный автор і одповідный редактор выданя Павло Роберт Магочій (на фотцї злїва), выдаватель україньской верзії книгы Валерій Падяк, спонзор выданя Стівен Чепа стрітили ся з председом Закарпатьской обласной рады Іваном Балогом, председом Закарпатьской областной адміністрації Олександром Ледидом (на фотцї справа) і ёго першым заступцём Іваном Бушком. Як інформовав академік, професор Торонтьской універзіты П. Р. Магочій, книга є перекладом другого, доповненого і переробленого выданя “Encyclopedia of Rusyn History and Culture”, яке вышло 2005 року у выдавництві Торонтьской універзіты. У новім выданю є высше 1 100 ілустрацій, 13 мап, унікатны архівны фотографії, якы ся друкують першый раз. Дане выданя є першов енціклопедіёв, котра є присвячена історічній минулости і културї карпатьскых Русинів ушыткых країн, де они жыють, – підкреслив академік. Высокы функціонарї Закарпатя ся інформовали, ці буде дане выданя популарізовати їх край, ёго історію. Як інформовали видавателї, 200 екземпларів енціклопедії буде дано до україньскых бібліотек. На Закарпатю выдання дістануть вшыткы районны бібліотекы і недїльны русиньскы школы. Презентація книгы зачала іщі минулого року на Словакії, 5. мая была в Києво-Печерьскій Лаврїі у Києві, теперь – в Ужгородї. Занедовго выдавателї планують попутовати до Будапешту на далшу єй презентацію (17. - 19. юна в рамках 11. засїданя Світового конґресу Русинів). Подля слов П. Р. Маґочія, всягды книга выкликала значный інтерес. В тому чіслї і міджі научныма працовниками Ужгородьской народной універзіты, якы приобіцяли писати статї про нове выданя Енціклопедії. Тоту публікацію авторы поважують продовжінём 10-томной „Енциклопедії історії України“. І докінця перевзяли дізайн україньского выданя.