21. мая 2011, а то нелем про Русинів, але і про маёрітный словеньскый народ і представителїв далшых 12 у нашій країнї узнаных народностных меншын буде списованя обывателїв, домів і бітїв у Словеньскій републіцї

Але, жебы сьме могли приступити к тому важному акту, треба нам знати пару своїх прав і то, жебы Вас списуючі комісарї „не обдурили“.
1. А найважнїше право каждого обчана СР є записати собі таке штатне обчанство, таку народность і такый материньскый язык, якы одчувать за свої.
2. Нихто Вас при тім не сміє овпливнёвати, підплачовати або, не дай боже, застрашовати.
3. З Вашой народности нихто ся не сміє высмівовати, ці за ню Вас крітізовати.
То суть три главны уставны права каждого обывателя Словеньской републікы, хоць, даколи, бывало і частїше, доходило до обдурёвань, главно старшых людей на селї. Вірю, же ся на будучій рік такы явы не обявлять, а кідь прийдете на штоменше порушіня хоць лем єдного з Вашых основных уставных прав при списованю, так треба такой скаржыти ся у представителїв орґанів діючіх в трестнім конаню!!!
В Листї ку списованю в роцї 2011 каждый правилный Русин, жебы не забыв зробити главно три хрестикы пером: в пунктї 9. Штатне обчанство: СР, 10. Народность: русиньска і 11. Материньскый язык: русиньскый !!!
Найвеце людей робить хыбу в тім, же собі повість (часто му то підшепне і списуючій комісарь), же кідь жыє на Словеньску – та є Словак. Великый хыба, на то ся уж не дайте налакати. Далшу хыбу роблять обчане, же материньскый язык сі напишуть русиньскый, бо так дома говорили і говорять, але народность часто уж словеньску, бо зась ту выступать арґумент, же жыєме на Словеньску. Снажыв єм ся нашым Русинам основы прінціпы списованя людей 2011 высвітлити, але ці ся мі то подарило?!