23. октобра 2009 в Бардіёві быв одборный семінарь під горї уведженов назвов. Ёго участниками были реномованы словеньскы історіци, музейници, функціонарї РОС, представителї славяньскых орґанізацію, русиньскы писателї, церьковны діятелї і представителї русиньскых медій. Главным цілём того научного фора было высловити ся ку історії і сучасности Русинів на Словеньску. Главным орґанізатором і автором проєкту акції быв Др. Іван Бандуріч.
На семінарї зо своїма рефератом Подїл Русинів на доселёваню выходного Словеньска выступив проф. ПгДр. Фердінанд Улічні, др. н., якый увів, же ани Русины, ани Словаци, ани Мадяре не можуть твердити, же лем они заселёвали выход Словеньска. На основі довгорічных научных выскумів підтвердив екзістенцію Русинів на тій теріторії у 14. – 19. сторічах, што арґументовав на основі штирєх фактів: 1. різны документы з тых часів, де ся вжывать термін Рутген (латиньска назва Русинів); 2. выраз православный, што не є нихто іншый, як Русин; 3. же в 14. ст. на нашу теріторію пришли волохы; 4. Русины в тім часї жыли лем на селах і пестовали много овець (Словаци ніт), также каждый волох быв властнї Русин. Потім зо своїма інтересным рефератами выступили: проф. Імріх Седлак, к. н., ПгДр. Миколай Ксеняк, ПгДр. Ярослав Цораніч, ПгД. і ПгДр. Ольґа Ґлосікова, др. н.