Новинкы • Noviny • News 20/2009

• Слїдами русиньской културы

  13. новембар 2009 буде належаты НАМ РУСИНАМ! Орґанізація Mолоды Русины, Містна орґанізація Русиньской оброды на Словеньску в Пряшові і Музей русиньской културы в Пряшові вас сердечно позывають на културно-сполоченьску акцію під назвом По слїдах русиньской културы в рамках Днїв русиньскых традіцій. Вірьте, же на акцію ся оплати прийты, бо цілый день буде повный умелецькых зажытків.

• Презентація новой книжкы в Няґові

  8. новембeр 2009 (недїльне пообідя) быв про Няґівчан меншым святом русинства, бо в тот день няґівскый народный будитель Осиф Кудзей презентовав свою уж третю серію баёк із назвов – Байкарёвы думы. Гварить ся, же дома не будеш пророком, но Няґівчане (мінімално тоты, што пришли на „хрестины“ новой книжкы) вказали, же свого автора мають в почливости і цїнять сі ёго актівіты. Заповнена сала културного дому ся на три годины стала єдным орґанізмом, котрый вказав, же в Няґові має чоловік ку чоловікови близко, а вказав і то, же в Няґові жыють Русины.

• Народне оброджіня Русинів на Словеньску в 19. і 20. ст.

  23. октобра 2009 в Бардіёві быв одборный семінарь під горї уведженов назвов. Ёго участниками были реномованы словеньскы історіци, музейници, функціонарї РОС, представителї славяньскых орґанізацію, русиньскы писателї, церьковны діятелї і представителї русиньскых медій. Главным цілём того научного фора было высловити ся ку історії і сучасности Русинів на Словеньску. Главным орґанізатором і автором проєкту акції быв Др. Іван Бандуріч.