13. новембeр 2009 буде належаты НАМ РУСИНАМ! Орґанізація Mолоды Русины, Містна орґанізація Русиньской оброды на Словеньску в Пряшові і Музей русиньской културы в Пряшові вас сердечно позывають на културно-сполоченьску акцію під назвом По слїдах русиньской културы в рамках Днїв русиньскых традіцій. Вірьте, же на акцію ся оплати прийты, бо цілый день буде повный умелецькых зажытків.
Проґрам цілоденного характеру зачне о 10. год. на Русиньскій уліцї славностным перестригнутём машлї за участи єй ,,кума“ – МУДр. Василя Янка, як і председы МО РОС у Пряшові, ПгДР. Михала Калиняка і за допроводу єдного з найлїпшых молодых гармонікарїв, Мартіна Караша з Камюнкы.
Потім там буде Варголіада і порядна шов-машкаріада, де выступлять ґрупы: UNDERGROUND & WARHOL, ART SHOW SHOCK & ROLL, WORKAHOLIC ANDY WARHOL, SHOW & SHOCK, ART & ROCK… Уліцёв будуть звучати популарны русиньскы співанкы, не буде хыбиты і ,,нефалшованый“ Енді Варгол або ёго парадны творы за участи роздаваня кока колы... Наслїдно о 16,30. год. буде одкрыта выставка нашых великанів,славных Русинів Пряшівщіны в просторах Театру Александра Духновіча в Пряшові. Богатый културный проґрам, котрый буде модеровати наш молодшый Антоніё Бандерас аліас Владо Чема, герець ТАД-у, зачне о 17. год. в Театрі А. Духновіча в Пряшові. Там Анна Сервіцька, Православный хор під веджіньом Анны Деревяниковой або популарне камюньске дуо, лавреаты Співів мого роду 2007– Івана Сивулькова і Мартін Караш. Прийде і популарна особность, но єй мемо зіставать в утаїню аж до кінця. Окрем того, буде богата презентація з діятельства молодых Русинів, многы факты з історії і сучасности Русинів у Пряшові, як і ёго реґіону. Припомянеме собі і 40. юбілей од заложіня фотбалового клубу Карпатія Пряшів, з той нагоды буде на вшыткых притомных чекати велике прекваплїня. Акція ся одбуде під покровительством председы Світового форума русиньской молодежы Інж. Мартіна Караша.
Цілоденна презентація русинства такого характеру буде у Пряшові першыраз і першыраз є орґанізовна трёма русиньскыма інштітуціями вєдно! Орґанізаторы ся уж теперь тїшать на вашу участь і вірять, же і вдяка вам ся іщі веце утримле контінуіта Русинів у пряшівскім реґіонї.
Тїшыме ся на вашу участь, вступ безплатный!