24. – 24 . децембра 2010 подля Ґреґоріаньского календаря а 6. – 8. януара 2011 подля Юліаньского календаря вшыткы хрістіане будуть славити рождественны свята а зато бы сьме і в нашых інтернетовых новинках хотїли календарьный рік закінчіти нетрадфічно – двома приговорами представителїв двох церьковлей, у якых є найвеце Русинів Словеньска, а то в ґрекокатолицькій і православній.

Рождественны свята в роцї 1952.
В арештї сидять арештанты, якы хотїли пережыти найкрасшый хрістіаньскый день в роцї в радости.
В нестраженых минутах міджі собов выклёпковали на стїну морзеовку, котров ся знали дорозуміти. Так ся за помочі своїх сполуарештантів догваряли і арештанты-священици: благореченый владыка Павел Петро Ґойдіч і отець Панкратій. Toгo святочного дня владыка Павел одказує отцёви Панкратіёви: „Кiдь буде ‚покій‛, отворь облачок і заспівай мі ‚Iзбавленіє посла Господь‛...“ („Выслободжіня посылать Господь“) – рождественный причастен, котрый ся співать на свято Божого народжіня перед святым причащанём). Приближно 8 – 10-минутовый „пoкій“ пришов, кідь ся черяли дозерателї. Тогды отець Панкратій отворив облачок і заінтоновав владыкови желаный спів, котрый їм обидвом вляв до сердець щіру рождественну радость і надїю на выслободжіня. Зась ся озывать клёпканя на стїну: спокійный владыка Павел од сердця дякує.
Як пережыєме тогорічны рождественны свята мы, котры жыєме в слободї?
Господь Бог нам хоче вляти до душы велику радость, через свій великый дар – самого себе. Новонародженый Спаситель світа нам приносить выслободжіня цїлого людьского поколїня спід ярма грїха, спід тяжобы самого себе. Новонародженый Спаситель світа нам приносить выслободжіня цїлого людьского поколїня спід тяжобы грїха, спід тяжобы духовного неприятеля – злого духа. Приносить покій до нашых душ, до нашых родин, до нашого народа, до нашой державы і до цїлого світа.
Владыка Павел не мав в арештї жаден маєток, не дістав жаден матеріалный дар, але пережыв в тот святочный день велику радость. Рождественны свята суть многыма людми похоплены як свята радости, але многы їх здеґрадовали на „обходный подник“ – реклама хоче вытяжыти з людьской щірости і доброты.
Пeред пaру роками у шведьскых новинках у часї перед Рождеством Ісуса Хріста обявив ся великый надпис: „Што сьте зробили зо свята народжіня? Прошу вас, не робте з того ярмарок!“ Підписаный властнов руков – Ісус Хрістос. В днешнїх часах через рождественны свята, маме много матеріалного, маме достаток вшыткого, але, жаль, і много раз порожнї сердця, порожнёго духа і непокій у душі. Рождественны співы в нашых церьквах, колядкы, звычаї, стрїча з нашыма найблизшыма – тото вшытко няй буде великым радостным прославлїнём нашого Спасителя Ісуса Хріста. Хрістос раждаєть ся!