Святый Отець Франтїшек 19. апріля 2013 у Ватіканї выменовав помічного єпіскопа про Пряшівску ґрекокатолицьку архієпархію. Став ся ним П. Мілан Лах, СІ, дотеперішнїй продекан про загранічны односины і розвой на Теолоґічній факултї Тырнавской універзіты в Братїславі. Сучасно ся став тітуларным єпіскопом Остраціна.

Менованя нового ёпіскопа є выразом пастырьской старостливости Святого Отця о добро віруючіх людей на Словеньску (позн. ред.: шкода, же при тім не думав на віруючіх Русинів, котры ся уж рокы з дакотрыма своїма душпастырями дожадують праві помічного єпіскопа про Русинів), жебы му не хыбовали добры священици, котры будуть реалізовати посланя церькви – допроводжовати Божый народ на пути к вічному жывоту. Єдночасно є вызвов про вшыткых людей, абы новомешнованого єпіскопа допроводжовали своїма молитвами і жертвами. Єпіскопску хіротонію прияв 1. юна 2013. Владыка Мілан Лах, СІ, нововыменованый помічный єпіскоп про Пряшівску єпархію, є ґрекокатолицькым монашскым священиком словеньской провінції Сполочности Ісусовой. Народив ся 18. новембра 1973 в Кежмарку. Мать трёх сородинцїв. Наймолодшый брат Петер є ґрекокатолицькым священиком Пряшівской єпархії. Свої дїтьскы рокы прожыв у підтатраньскім селї Любіца. Ґімназіалны штудії закінчів матуров у 1992 роцї в Кежмарку. Свідомый сі Божого покликаня ку свыщеництву быв у тім же роцї приятый до ґрекокатолицького священицького семінара і на Ґрекокатолицьку богословску факулту УПЙШ в Пряшові (в сучаснім Ґрекокатолицька теолоґічна факулта Пряшівской універзіты у Пряшові). По скінчіню третёго річника , одчуваючі в собі монашске покликаня, у 1995 роцї вступив до новіціату Сполочности Ісусовой у Тырнаві, де по двох роках склав обіцяня вічной службы. В основных теолоґічных штудіях продовжовав в роцї 1997 на Теолоґічній факултї Тырнавской універзіты (ТҐ ТУ) в Братїславі. В роках 1999 – 2000 быв у рамках монашской формації на маґістерцї як выхователь на єзуітьскім хлопчім інтернатї в Кошіцях. Теолоґічны штудії скінчів на ТФ ТУ в Братїславі у 2001 роцї. З рук теперїшнёго кошіцького єпархіалного єпіскопа владыка Мілана Хаутура 11. новембра 2000 прияв діяконьске а 1. юла 2001 священицьке высвячіня у Катедралнім храмі Народжіня Пресвятой Богородіцї в Кошіцях.

В роках 2000 – 2001 выконовав цівілну наградну службу в єзуітьскій комунітї в Кошіцях, а попри тім до року 2003 діяв у Центрї спірітуаліты Выход – Запад Міхала Лацка, научно-бадательского робочого місця ТФ ТУ, як научный робітник. Почас того діятельства робив вєдно з отцём Яном Бабяком, СІ, теперїшнїм пряшівскым архієпіскопом і метрополітом. Од 2003 до 2004 року быв повіреный веджінём Центра спірітуаліты Выход – Запад в Кошіцях. Єдночасно як священик пасторачно помагав віруючім у Кошіцях і околіцї. В 2004 роцї зачав высшы штудії на Папежскім выходнім інштітутї в Римі, де у роцї 2006 здобыв ліценціат із выходных церьковных наук і в роцї 2009 здобыв докторат у тым істым одборї обгаїнём дізертачной роботы Принос Юрія Іоаннікія Базиловіча, ЧСВВ, на монашску формацію василіанів Мукачовской єпархії в роках 1789 – 1821. Окрем скушеностей із среды загранічных ученых і з духовной службы як поімічный спірітуал Папежской колеґії „Russiсum“ і як духовный асістент Федерації скавтїв Европы в Римі. Авторьскы сполупрацовав із Ватіканьскім розгласом.

По навернутю зо штудій у Рим, од року 2009 робив як директор зась у Центрї спірітуаліты Выход – Запад М. Лацка в Кошіцях. Попри забезпечованю научно-бадательскых задач центра, орґанізовав научны конференції, помагав у будованю книжного фонду і надвязованю контактів зо загранічом, учів єден семестер спірітуаліту хрістіаньского Выходу на Теолоґічній факултї Католицькой універзіты в Кошіцях, де быв і членом редакчной рады теолоґічного часопису „Verba Theologica“. Свою увагу засередив тыж на то, жебы одборны знаня были передаваны шыршій средї людей, а то публікованём своїх статей у часописах і орґанізованём научно-популарных лекцій у споминанім Центрї. Од 1. децембра 2011 діє як продекан про загранічны односины і розвой на Теолоґічній факултї Тырнавской універзіты в Братїславі, де учіть хрістіаньску спірітуаліту і спірітуаліту хрістіаньского Выходу. Областёв, котров ся одборно занимать, є выходна хрістіаньска спірітуаліта. В Чінї Сполочности Ісусовой на Словеньску быв од 30. децембра 2009 конзултантом провінціала і од 1. януара 2012 быв і делеґатом про формацію єзуітьскых схоластіків. В тім часї ся приправовав на аболвованя тзв. третёй пробації на зложіня славностных вічных клятв. Научну роботу выважовав роботов із людми. Занимав ся духовнов службов ґрекокатолицькым віруючім як помічный священик у братїславскій парохії. Быв актівным у Федерації скавтів Европы як народный духовный асістент. Міджі ёго залюбы належыть природа, книжкы і спів. Уж в чацї высокошкольскых штудій співав у Хорї св. Романа Сладковпівця у Пряшові. Добрї говорить по таліаньскы, актівно комуніукує по анґліцькы і російскы, пасівно знає французжкый язык.