Кінцём децембра 2011 вышла послїдня книжка в русиньскім языку, котру фінанчно підпорило Міністерство културы СР посередництвом свого проґраму Култура народностных меншын 2010, a тo Русиньскы соловї зoставителькы Aнны Плїшковой, зборник выданых літературных творів у русиньскім языку в прилозї Народных новинок – Поздравлїня Русинів у роках 1995 – 2000.
Перед тым у роцї 2010 были выданы тоты публікації в русиньскім языку: Зеркалїня/Zrkadlenie (двойязычна, і в словеньскім языку на протилежній сторінцї русиньского тексту) Mиколая Ксеняка і Русиньскый літературный алманах на 2010-ый рік зoставителя Aлeксaндра Зозуляка (oбидві выдав Сполок русиньскых писателїв Словеньска), Мої жалї Юрка Харитуна (выдаватель Академія русиньской културы в СР), Думкы і тужбы Квeты Moрoховічовой-Цвик, Ґрекокатолицькый священицькый род Павловічовых із Шарішского Чорного (1693 – 1900) Рудолфа Павловіча, І Янкови, і нянькови Iвeты Meлничаковой а теперь Русиньскы соловї (тоты послїдны штири выдав Русин і Народны новинкы).
Сполочна презентація вшыткых спомянутых книжок буде у фебруарї 2011 в засїдалнї ректора Пряшівской універзіты в Пряшові на Намістю леґіонарїв 3, вєдно з роздаванём новых книжок, автоґраміадов і переданём оцїнїнь найлїпшым участникам Літературного конкурзу СРПС у 2010 роцї. Уж теперь позываме вшыткых на тоту акцію, котрых інтересує сучасна русиньска література на Словеньску.

-аз-