Новинкы • Noviny • News 1-2/2011

• Міджі оцїненыма і А. Сервіцка

  11. януара 2011 в історічній будові Театру Йонаша Заборьского в Пряшові ся одбыв уж 7. річник передаваня найвысшых оцїнїнь Пряшівского самосправного края – Цїны ПСК і Цїны председы ПСК. В тім роцї Цїна ПСК была передана: Янови Лазорикови, Павлови Гурайтови і Єгудови Лагавови, іn memoriam. Цїну председы ПСК з ёго рук дістали: Русинка Анна Сервіцка, представителї ВК Гуменне і Любовняньского музею.

• Сьме в роцї списованя людей

  1. януара 2011 зачав час актівіт перед списованём людей, котре про Русинів є барз важне, і буде 21. мая. Мы віриме, же вшыткы Русины ся приголосять Русинами і свій материньскый язык собі запишуть язык русиньскый.

• Юбіланты православной церькви

  1. януара 2011 ославив 60 років од народжіня владыка Евґен Ян Кочіш, емерітный єпіскоп а 21. януара буде святковати своє 50-річа єромонах Метод Мілан Біланчік, ЧСВВ.

• Новы русиньскы публікації

  Кінцём децембра 2010 вышла послїдня книжка в русиньскім языку, котру фінанчно підпорило Міністерство културы СР посередництвом свого проґраму Култура народностных меншын 2010, a тo Русиньскы соловї зoставителькы Aнны Плїшковой. Перед тым были выданы тоты публікації в русиньскім языку: Зеркалїня/Zrkadlenie (двойязычна), Русиньскый літературный алманах на 2010-ый рік, Мої жалї, Думкы і тужбы, Ґрекокатолицькый священицькый род Павловічовых із Шарішского Чорного (1693 – 1900), І Янкови, і нянькови. Сполочна презентація вшыткых спомянутых книжок буде у фебруарї 2011 в засїдалнї ректора Пряшівской універзіты в Пряшові.

• По Фіялочцї вышла Пчолка

  Кінцём децембра 2010 вышла далша книжка поезії про дїтей од Гелены Ґіцовой-Міцовчіновой, а то під назвов Пчолка, і так ся єй в єднім роцї подарило выдати дві зборникы стишків про дїти.