В октобрі 2009 вышли три книжкы русиньскых авторів, єдна по словенськы а дві по русиньскы. Іде о тоты книжкы: „Daniel v jame levov... alebo Neskartované pamäti národa“ о. Ф. Крайняка, „100 вызнамных Русинів очами сучасників“, ІІ. часть“ М. Малицовской і кол. і „Нагода або судьба“ Ш. Смолея.

„Daniel v jame levov... alebo Neskartované pamäti národa“ (2009, 112 с.) – то є назва публікації русиньского священика, о. ТгЛіц. Франтїшка Крайняка з Камюнкы, в котрій пише о своїх зажытках зо стріч із провокуючіма працовниками штатной безпечности минулого режіму в нашій републіцї, з тым, же го Інштітут памятї народа у Братїславі означів за сполупрацовника ШТБ, але він своє мено у суднїм спорі з тов інштітуціёв як єдиный священик очістив, а то і за помочі свого обгайцю Яна Чарноґуркого.

„100 вызнамных Русинів очами сучасників“, ІІ. часть“ (Пряшів: Світовый конґрес Русинів, 2009, 124 с.) – назва далшой новой книжкы зоставителькы і авторкы векшыны статей у ній, Марії Мальцовской, котра вєдно з далшыма представила такы особности Русинів, як А. Біттнерова, М. Гиряк, Я. Гриб, Ш. Ґойдіч, В. Зозуляк, В. Янко, М. Корбова, А. Кралицькый, М. Ксеняк, Н. Ляш, І. Латта, митрополита Лавр, М. Лучкай, М. Мачошкова, М. Мальцовска, М. Нёмцова, Владыка Николай, Ю. Ставровскый-Попрадов, А. Старостова, Ш. Сухый, Ш. Чепа i ін.

„Нагода або судьба“ (Пряшів: Сполок русиньскых писателїв, 2009, 144 с.) – пята публікація русиньского писателя із Міджілаборець, Штефана Смолея. На тот раз є то прозовый твір о судьбі і жывотных періпатіях главной героїнї – Марькы.
Віриме, же тоты ублікації вас заінтересують.