Народна премія была основана премєр-міністром Мадярщіны іщі в 1995 роцї. Тов преміов оцїнюють ся особности і інштітуції Мадярьска і споза граніцї, котры досягли найлїпшы резултаты у сполоченьскім жывотї, освітній, културній, церьковній, научній, новинарьскій і господарьскій сферах на хосен меншыновых сполочностей. Нарородна премія за рік 2013 была 16. децембра 2013 в рамках святкованя Дня народностей у будові Мадярьского народного музею передана праві сполоченьскому часопису Русинів Мадярщіны – „Русиньскый світ“.

Святочный приговор мав міністер Міністерства людьскых здроїв Золтан Балоґ, котрый на зачатку підкреслив, же особа, яка при списованю людей два раз заповнять колонку „нартодность“ (ославлює першу і другу народность) не є даякым унікатом у южнокарпатьскых долинах, але є богатшов, затоже представлять нараз дві народностны културы. Подля мадярьской влады народностна різнородость Мадярщіны робить державу лем красшов і богатшов, а веджіня штату фурт підпоровало і буде підпоровати народностны културы Мадярщіны. Праві він в менї премєр-міністра Віктора Орбана, за притомности штатного секретаря Др. Золтана Ковача, віце-секретарїв міністерства Др. Чабы Латорцая і Др. Петра Гарая у славностній салї высше спомянутого музею міджі іншыма передав высоке оцїнїня і редакції часопису „Русиньскый світ“, котру перебрав єй шефредактор проф. Др. Михал Капраль, к. н. Почас цїлой екзістенції Народной премії то было то першыраз, кідь Премію перевзяв прердставитель русиньской меншыны у Мадярщінї.

Святочна церемонія, котра ся одбыла у прекрасній атмосферї, была збогачена концертом, приправленый представителями нїмецькой, словацькой і іншыма меншыновыма обществами Мадярщіны. На кінци свята была презентація унікатного выданя, в котрім у мадярьскім языку і языках народностных мерншын, з богатством красных ілустрацій народных страв ушыткых тринадцятёх народностных меншын, русиньска кухня є презентована трёма рецептами: пісных голубцїв з грибами, бобалёк і печеного токаня.