Не дасть мі, жебы єм днесь не высловила своє велике подякованя Сполку русиньскых писателів на челї з ПгДр. Кветославов Копоровов. ПгД, і такым нашым писателям і Русинам, як є бывшый председа сполку ПгДр. Миколай Ксеняк, Мґр. Гавриіл Бескид, доц. ПгДр. Анна Плїшкова, ПгД., ПгДр. Ольґа Ґлосікова, др. н., Мґр. Александер Зозуляк і іншы, за їх моралну і фінанчну підпору моёй културно-освітнёй, писательской і дописовательской роботы з Русинами і про Русинів. Цїлый свій жывот ся намагам многыма способами давати своє сердце нашым Русинам, ці то уж статёв, віршом, прозовым твором, співанков або приговором, як через новинкы, розглас і прямо на сценї. Ходжу всягды там, де ся сходять нашы Русины. Орґанізую їх і сама, жебы єм їх выслухала і повіла їм пару своїх поетічных слов або і заспівала. Зато мі прийде міцно тепло при сердцю, кідь такы мої актівіты видите і Вы в Сполку русиньскых писателів Словеньска і докажете ня потїшыти красныма мотивуючіма словами, ці то уж в письмі, в телефонатї, або і фінанчным гонораром. Зо сердця Вам за таке красне Ваше довіря, поміч і підпору дякую. Бо так собі я, як особа представлюю нашу взаємну сполупрацу і порозуміня, абы сьме ся мы – Русины вєдно доказали тішыти зо сполочно выконаной роботы. Абы сьме собі помагали. Абы сьме сі не завидїли і тримали ся у взаємній почливости. Лем тогды нас нашы русиньскы сполужытелї будуть решпектовати, давати нам почливость, розуміти нам і наслїдовати нас! Задумайме ся вшыткы над собов і глубоко собі важме єден другого і роботу каждого єдного із нас, бо є прекрасна, міцно потрібна і много раз нашым еґоістічным справанём достаточно не оцїнена!!! Желам Вам вшыткым міцно много здоровя, сил і творчіх успіхів на хосен нашых так тяжко пробованых Русинів!!!