Православне Рождество у Кошіцях

На завершіня праздника Рождества Ісуса Хріста у недїлю,12. януарa 2014 р. православны віруючі у Кошіцях ся зышли в просторах нового Православного катедралного храму Успенія Пресвятой Богородіцї i св. Яна Милостивого на уж традічнім рождественнім концертї. Тот уж третїй традічный концерт быв необычайный, бо ся одбывав тїсно по тым, як душа нашого отця духовного мітр. прот. проф. ТгДр. Імріха Белейканіча, к. н., одышла до вічности. Тым коцертом кошіцькы православны віруючі хотїли проявитити велике подякованя своёму отцёви духовному за ёго доброту, за поміч і ласку ку каждому віруючому, а головнї за то, же ёго заслугов быв выбудованый в новодобій історії міста Кошіць першый прекрасный православный храм.

Головным орґанізатором того святочного концерту быв наш православный хор на челї з діріґентков і режісерков того святочного вечера Мґр. Славков Ксеніёв Рудачковов, ПгД. На тім двойгодиновім концертї, на котрім ся представило шість співацькых колектівів і солісты, было чути в репродукторах із розгласового архіву і голос нашого отця Імріха Белейканіча. По вступній піснї із репродукторів „Отче мій духовный“ наслїдовала з нотбуковой награвкы пісня „Чом мы ту жыєме на тій прекрасній Землї“, котру заспівала сытым сопраном співачка з Києва Ольґа Угнівенько.

Модераторка Стефанія Левканічова на обяснїня, чом треба орґанізовати такы концерты, дала слово нашому отцови духовному Імріхови Белейканічови, котрый через репродукторы з розгласово архіву говорив, окрем іншого, і тото: „Змыслом тых рождественных концертів є обновляти стары звыкы і традіції, котры нам зохабили нашы родиче, нашы дїдове і прадїдове. Старайме ся, жебы тота наша хрістіаньска култрура в днешнїй поларізованій добі не заникла, не дайме їй пропасти. Тоты рождественны піснї і колядкы суть прекрасны, они нас збогачують нелем формално, но они проникають до нашых сердець. Было бы великов хыбов, кібы сьме тоту хрістіаньску културу, як наслїдстово по нашых предках, не сохранили“.

Тот приговор о. Белейканіча віруючі в храмі слухали без дыху і было то про них штось несподїване чути голос нашого отця духовного, коли він уж не є міджі нами. За тоту ідею мы вдячны нашому о. Белейканічови і в традіції концертїв будеме продовжовати.

Потїм уж модераторка кликала перед публіку выступаючі колектівы, жебы наповнити одказ о. Імріха о Православнім Рождестві у Кошіцях. Першым выступаючім быв наш домашній православный хор, котрый при колядцї „Пасли вівцї пастырї“ выступовав і в зоставі „октето“. Традічно на тых концертах выступать і мужська співацька ґрупа „ПОЛЯНА“ з Кошіць. Їх спів колядкы „Ставай, ставай господарю“ нам припоминать даколишнї парібськы співы колядок на святый Вечур під окнами на селї. Великый аплавз настав, кідь перед притомных наступила Ромська співацька ґрупа „VIENALA“ із Марковець. Піснї „Стань Давіде з гуслями“ або „Святая Варвара“ были заспіваны на высокій умелецькій уровни. Православный хор св. Тройцї із Свідника співом пісень „Бог предвічный...“ і „Пречістая Дїва“ підтвердив свою зрілость і рады го привітаме у нас частїше. Великый успіх у притомных мало тріо в зложіню: Ольґа Угнівенько, котра наперед заспівала соло пісню „ Понад Віфлеємом...“, а потїм дуо з Ірінов Мацковов пісню „В зеленїм листку“ і тріо з Др. Рудачковов пісню „А Дїва Марія Сына породила... “ Найвекшый аплавс прозвучав, кідь приходило перед людей тріо „ТРОПАРЬ“ із Свідника. Кажду їх пісню притомны оцїнёвали бурливыма аплавзами. Но найвекшый быв по скінчіню піснї „Віфлeєм“, кідь притомны ляпкали постоячкы. Міджі выступами співацькых колектівів архідіаком Матуш Спішак чітав писма апостола Павла. По них наслїдовала єктенія „Помилуй нас Боже...“ і концерт закінчів ся піснёв „Вічная память...“, котру співали вшыткы віруючі.

При закінчіню концерту модераторка панї Левканічова за вшыткых віруючіх Православной парохії в Кошіцях подяковала о. Белейканічови за вшытко то, што зробив про кошіцькых православных віруючіх, а не было того мало. Найщіріше подякованя ёму належыть за выбудованя православного храму. Най Господь Бог прийме ёго душу до Царства небесного, навсе будеш у нашых сердцях, дорогый отче. Вічная ёму память!
Інж. Іван ФРІЦЬКЫЙ, Кошіцї, 14. януара 2014

1. Хор Православного катeдралного храму Успенія Пресвятой  Богородицї і св. Яна Милостивого у Кошіцях.

1. Хор Православного катeдралного храму Успенія Пресвятой Богородицї і св. Яна Милостивого у Кошіцях.

2. Небогый митрополитный протоієрей  проф. ТгДр. Імріх Белейканіч, к. н.

2. Небогый митрополитный протоієрей проф. ТгДр. Імріх Белейканіч, к. н.

3. Православный хор з о. Спішаком і архідіаконом Матушом при образі о. Белейканіча.

3. Православный хор з о. Спішаком і архідіаконом Матушом при образі о. Белейканіча.