28. і 29. децембра 2009, як каждорічно, Педаґоґічна і соціална академія у Пряшові зорґанізовала День отвореных дверей про родічів і потенціалных штудентів, котры сі послали приглашкы на тоту школу. В рамках презентаціїї родічі і їх дїти дістали інформації о вступных екзаменах на тоту школу, як і о предметах, котры ся на даній школї учать. В рамках повинных предметів быв запрезентованый і русиньскый язык, котрый сі штуденткы можуть выбрати. Педаґоґічна і соціална академія є єдинов середнёв школов у Пряшові, на котрїй можуть тот предмет штудовати дїти, котры приходять з русиньскых сел і про котрых є тот язык їх материньскый. Презентацію зробила ПгДр. Кветослава Копорова з Інштітуту русиньского языка і културы Пряшівской універзіты (ПУ), котра представила і можность наслїдного штудія того предмету на ПУ, як і уплатнїня абсолвентів штудіа в практічнім жывотї.
При першім контактї з тов понуков проявило о русиньскый язык інтерес 9 родічів, причім, як інформовала директорка школы Мґр. Терезія Мрвова, про вытворїня єдной ґрупы русиньского языка є потребных 12 школярїв. Будеме ся надїяти, же така ґрупа взникне. Быв бы то добрый крок ку тому, жебы ся поступно вытворяла база про высокошкольске штудіюм русиністікы на Пряшівскій універзітї.