21. юна 2009 в Театрі А. Духновіча в Пряшові была стрїча з філмовыма документами о Русинах, споміджі котрых заінтересовав главно філм Василь Гопко, благореченый Русин. Молода зачінаюча режісерка Івана Лемпелёва презентовала уціленый погляд на найтраґічнїшый період ёго жывота. Оптіков позерателя днешнёй добы, доповненов новыма, дотеперь непублікованыма архівныма фотодокументами, враховано выповідї священика, сполувязня єпіскопа і далшых ёго сучасників, росшырює познаня жывотной калварії владыку Гопка почас вязнїня в найкрутїшых арештах бывшого режіму, але і потім, почас далшой інтернації в чеськім Осеку.