8. і 9. септембра 2009 была премєра філму Осадне, котрый на 44. річнику Міджінародного філмового фестівалу в Карловых Варах у Чехії здобыв Цїну за найлїпшый документарный філм над 30 мінут. Є то філм о найвыходнїшім кутику Европской унії, о русиньскім селї Осадне (окр. Снина), ёго жытелях і їх політічных поглядах, у котрім домінують главно трёме протаґоністы: староста села Ладíслав Мікулашко, православный піп Петро Сорока і русиньскый актівіста Федор Віцо. Крішталёвый ґлобус і 5 тісяч америцькых доларів перевзяли творцї того філму: режісер Марко Шкоп, камераман Ян Меліш і стригач філму Франтїшек Крегенбіл. І філм М. Шкопа Іншы світы, котрый є тыж о Русинах, быв у Карловых Варах так істо оціненый – в р. 2006, а то Окремов цінов і Цінов позерателїв, котру выголосив денник Право. Высше спомянуты творцї і главны пропаґоністы оцїненого філму Осадне были притомны на премєрах філму 8. септембра у кінї Сентрум у Снинї і 9. септембра в кінї Кінемакс у Пряшові. Тоты премєры были за участи повной салы позерателїв і мали значный успіх.