10. апріля 2010 до готела Сенатор в Пряшові ініціатівна ґрупа на челї з Інж. Яном Ліпіньскым, ПгДр. Александром Дулебом, к. н. і доц. МУДр. Михалом Штенём, к. н., скликали громаду, на котрій бы было прияте рїшіня о заложіню партії під назвов НАШ КРАЙ. На громадї взяли участь главно члены Русиньской оброды на Словеньску і Союзу Русинів-Українців Словеньска на челї з ёго председом Інж. Яном Соколом.

В послїднїх місяцёх много ся говорило о заложіню політічной партії, котра бы репрезентовала Русинів на Словакії, главно з проґрамом заміряным на економічный розвой северовыходной Словакії, де переважна часть Русинів жыє. Подля общой думкы заложіня політічной партії Русинів бы могло быти хосенным кроком і зміцнити поставлїня Русинів у сполоченьско-політічнім жывотї. З тым цілём была скликана і громада у Пряшові. Такой на зачатку ся указало, же заложіня новой партії є проблематічне . Сценарь заложіня новой партії припомянув пробу з року 2000, кідь мала взникнути політічна обчаньска ініціатіва під назвов Народна громада Русинів-Українців СР, од котрой ся Русиньска оброда діштанцовала.
Діскутуючі з рядів Русиньской оброды Федор Віцо, ЮДр. Петро Крайняк і Др. Іван Бандуріч высловили жаданя вытворїня партії, котра бы была ідентіфікована на народностнім прінціпі, як партія Русинів, причім слово „русиньска“ бы мало быти в назві партії. Подля їх думкы назва партії Наш край выражать лем неконкретный ґеоґрафрічный характер партії, котрый не ословить Русинів і засложіня партії не буде нима акцептоване. Єдночасно в шырокій діскусії о характерї партії катеґорічно одшмарили тенденцію проб о споїня ідентіты Русинів і Українців і іґнорованя признати ліквідачну політіку односно Русинів у роках 1950 аж 1989.
На громадї была высловлена тыж пропозіція на встановлїня центра партії в будові Руського дому в Пряшові, што притомных Штефана Секерака і Інж. Павла Бірчака, контроверзных представителїв Руського клубу – 1923 евіденто несподївало, причім ку тій пропозії не дали конкретну одповідь.
Далша судьба взнику новой партії є одкрыта і мож чекати, же далшы адміністратівны крокы ку заложіню партії, одшмарюючі народностный прінціп, главно назбераня потребных 10 тісяч підписів потребных на заложіня партії, будуть реалізованы без підпоры тых Русинів, котры суть згодны з поглядом представителїв Русиньской оброды.