29. юна 2010 ректор Пряшівской універзіты, проф. РНДр. Рене Матловіч, ПгД., прияв учітелїв 1. Міджінародной лїтнёй школы русиньского языка і културы Studium Carpato-Ruthenorum 2010. З професором Др. Павлом Робертом Маґочіём (Канада), Валеріём Падяком, к. н. (Україна) і доц. ПгДр. Аннов Плїшковов, ПгД. (Інштітут русиньского языка і културы ПУ) діскутовали о уровни реалізації тройтыжднёвого проєкту лїтнёй школы, о можностях навчаня русиньского языка на Пряшівскій універзітї про штудентів з Україны i о перспектівній сполупраці Пряшівской і Торонтьской універзіт. Єднов з діскутованых тем была тыж приправа міджінародного проєкту заміряного на розвой русиньского школства на Українї і в іншых країнах карпатьского реґіону. Ёго ініціатором є Надація „Русиньска школа“ в Ужгородї, на челї котрой стоїть якраз Валерій Падяк, котрый ректорови ПУ понукнув партнерство на проєктї через Інштітут русиньского языка і културы ПУ. Ректор Р. Матловіч понуку прияв з надїёв, же реалізація такого проєкту може принести хосен про вшыткых партнерів, якы довгодобо суть актівныма в процесї ревіталізації русиньского языка і школства.