29. октобра 2009 были урядно схвалены народны сімболы Русинів – ерб, застава і гімна. Застава є тройфаребна: червена, біла і синя з русиньскым ербом в серединї, так як є сімболіка Русинів світа, лем тота є доповненена із заставы Хорватьской републікы вертікалныма червеныма і білыма смугами над ербом. Гімнов Русинів Хорватії є пісня „Браца Русини“, але кус модіфікована. Пропозіція на споминаны сімболы была предложена Радї про народностны меншыны Хорватьской републікы в половинї септембра 2009, также дїло сімболів ся так стало дїлом урядным. Перед тым пропозіція была річов шырокой діскуції Русинів у Хорватії, котра ся завершыла іщі в септембрї 2008 і наслїдно была сформулована Коордінаціов рад русиньской народностной меншыны.
Народне свято Русинів Хорватії буде ся ославлёвати 25. мая, што є датум споєный із заложінём ґрекокатольцькой парохії у Петровцях. Уж кінцём того року на Коордінації рад русиньской народностной меншыны зачне ся з приправов 1. Народного свята Русинів у Хорватії , котре найвірогоднїше буде в містї Вуковар.