12. децембра 2010 в Домі културы в Свіднику одбыв ся 18. річник Віфлеємского вечора. Цілы тоты рокы в передріствянім часї приправлує Окресна орґанізація Русиньской оброды у Свіднику ріствяный концерт у русиньскім дусї. Сполуорґанізаторами той прекрасной акції были: Окресный освітный центер і Містьскый уряд у Свіднику.
Того року в проґрамі вечора выступили дїточкы зо вшыткых матерьскых і основных шкіл міста. Прекрасно ся презентовав і дїтскый фолклорный колектів Маковичка. В проґрамі концерту выступило 182 участників з колядками, вінчами, віфлеємскыма грами і танцями. Было на што ся позерати і што слухати. Уж од скорого пообідя быв Дом културы переповненый позерателями вшыткых віковых катеґорій, міджі котрыма найвеце было родічів і старых родічів. На концерт завітав і новозволеный будучій пріматор міста Інж. Ян Голодняк і далшы честованы гостї.
Віфлеємскый вечур быв зорґанізованый на професіональній урчовни дякуючі добрій співпраці вшыткых трёх співорґанізаторів і їх довгорічной практікы. На марґо тогорічного і минулорічных Віфлеємскых вечорів люде з области културы ся высловили, же не є в Домі културы масовішой акції як є Віфлеємскый вечур. Свідницкый Дом културы є про наше місто аж крітічо малый, много людей зістало у вестибулї, якы лем слухали, а нїч не відїли. Многы ся повертали домів. Наше подякованя адресуєме і спонзорам: Інж. Михалови Гомзови, председови представенства ПСС Свідник, а. с., Бкл. Микулашови Крайковічови, посланцёви НР СР, Петрови Пилипови, посланцёви Пряшівского самосправного края, Еві Гомзовій, посланкыні Містьского заступительства в Свіднику і далшым. Окреме хочеме ся подяковати Мґр. Ярославови Іванчови, штатному таёмникови Міністерства школства СР за дуже щерый спонзорскый дар, вдяка котрому каждый выступаючій і учітелї, што їх приправлёвали однесли собі богату солодку выслужку. Так як і минулорочный, і тогорочный наш Віфлеємскый вечур быв орґанізованый без фінанчной підпоры Міністерства културы СР.