28. – 29. авґуста 2009 у Мішколцу быв научный семінарь на тему Андрій Бачіньскый (1732 – 1809) – найвызнамнїшый мукачовскый русиньскый ґрекокатолицькый єпіскоп. Тот научный семінарь зорґанізовали: русиньска меншынова самосправа і Русиньске меншынове културне общество Сполочна сила в Мішколцу, Русиньске културне общество Будителї і Русиньскый научный інштітут у Будапештї. На тім семінарю взяло участь высше 20 участників, окрем домашнїх лекторів, і лекторы з Україны і Словакії. Двойденный семінарь проходив у културнім домі ґрекокатолицькой єпархії. Цілём семінаря было аналізовати жывот і діятельство вызнамного патріота, освітнёго діятеля, хранителя русиньского языка – А. Бачінького, котро 200 років од смерти собі припоминаме праві в тім роцї. Зо словацькой делеґації на научнім семінарю выступили: ПгДр. Ліц. Ґабріел Секель із Ґрекокатолицькой митрополії у Пряшові, ПгДр. Станїслав Конєчні, к. н. із Сполоченьско-научного інштітуту Словеньской академії наук у Кошіцях, Мґр. Гавриїл Бескид і Інж. Димитрік Крішко з Пряшова. На семінарю было мож чути много цінного і обявного зо жывота і творчости А. Бачіньского. В рамках семінаря было і одгалїня памятной таблы при входї стародавной ґрекокатолицькой церькви в Герембели на почесть 200 років од смерти А. Бачіньского. Акт одгалїня той таблы зробив містный парох, декан Др. Ласло Дудаш.