2. юла 2010 в резіденції Пряшівского ґрекокатолицького архієпіскопского уряду в Пряшові за участи канцеларя і говорцї архієпіскопства, ТгДр. Любоміра Петрика, ПгД., прияв професора історії Торонтьской універзіты, Др. Павла Роберта Маґочія і директорку Інштітуту русиньского языка і културы Пряшівской універзіты в Пряшові, доц. ПгДр. Анну Плїшкову, ПгД., Монс. Ян Бабяк, СІ, пряшівскый архієпіскоп і митрополита.
Планованов темов діскузії мало быти вжываня русиньскоязычных пасторачных і літурґічных перекладів у ґрекокатолицькых парохіях з перевагов жытелїв Русинів, дінамічнїше удїлёваня імпріматуру на вжываня уж переложеных текстів, потреба едукації штудентів богословія ґрекокатолицькой теолоґічной факулты ПУ в области русиньского языка, културы і історії Русинів...
Приятя з боку найвысшого єрархы ґрекокатолицькой церькви од самого зачатку было неформалне, аж приятельске. Таке зістало почас цїлой недовгой стрїчі, яку архієпіскоп і митрополита закінчів очівісно з доводу напланованых важнїшых повинностей. І так діскузія ся не стигла розвинути подля обчековань участників і дакотры важны вопросы зістали без одповідї. Участници ся стигли дотулити вопросу едукації богословцїв у русиньскім языку, якый найвысшый представитель ґрекокатолицькой церькви планує продіскутовати з деканом теолоґічной факулты. Як знаме, є то тема, яка ся настолює мінімално од взнику Оддїлїня русиньского языка і културы Інштітуту народностных штудій і чуджіх языків на Пряшівскій універзітї (1998), нажаль доднесь не має конкретных резултатів.