Од 28. до 4. юла 2010 прошов послїднїй тыждень лїтнёй школы русиньского языка і културы. О першім і другім тыждню І. річника STUDIUM CARPATO-RUTHENORUM 2010 – міджінародной Лїтнёй школы русиньского языка і културы на Пряшівскій універзітї в Пряшові (ПУ) сьме писали в минулім і передминулім чіслї нашых iнтернетовых новинок. Теперь бы сьме хотїли пару словами повісти о цїлім третїм тыждню.
На самый перед треба повісти, же лекції з обидвох предметів (русиньскый язык і історія Русинів) проходили надале реґуларно, подля проґраму. Штуденты проявили нечекану заінтересованость о тоты предметы і ініціатівный приступ к навчаню.
Окрем навчаня, про 27 штудентів на тот тыждень тыж быв приправеный і іншый проґрам, жебы здобыли много новых знань і зажытків. Штуденты высоко оцїнёвали, же 30. юна могли взяти участь на літературнім вечорї з лавреатами Премії Александра Духновіча за русиньску літературу, котру удїлює Карпаторусиньскый научный центер у США а фінанцує Штефан Чепа з Канады. (Пишеме о тім в окремій статї.)

2. юла пообідї штуденты, лекторы і орґанізаторы ся стрїтили на заключнім церемоніалї, в рамках якого выступили: директорка Інштітуту русиньского языка і културы Пряшівской універзіты (ПУ), доц. ПгДр. Анна Плїшкова, ПгД., лекторы русиньской історії: проф. Др. Павел Роберт Маґочій, ПгД. і Мґр. Валерій Падяк, к. н., а наконець проректорка про загранічны дїла ПУ, доц. ПгДр. Івета Ковалчікова, ПгД.
А. Плїшкова в першім рядї подяковала вшыткым участникам і орґанізаторам за їх роботу, але тыж оцїнила цїлкову уровень першого річника лїтнёй школы. К тому ся высловили і уведжены лекторы і проректорка ПУ І. Ковалчікова, яканаконець передала участникам цертіфікаты о абсолвованю школы і памятного табла з фотоґрафіями вшыткых лекторів і штудентів. Обидва документы были приємным несподїванём про штудентів, якы на памятку собі могли купити трічка выготовлены шпеціално про участників лїтнёй школы.
Заключный проґрам акції збогатив културный проґрам, в якім спочатку выступила успішна інтерпретка русиньскых народных співанок – Анна Сервіцька, яка в допроводї акордеоністы Йожка Пірога заспівала свої найпопуларнїшы співанкы. Добру атмосферу розвивали дале членове русиньской вокално-інштрументалной ґрупы Пайташе зо Снины на челї з Мґр. Даньєлом Гулаём. Вечур ся скінчів веселым співом і темпераметныма танцями участників проєкту. Наісто ся врыє глубоко до їх памяти.

У суботу, 3. юла, участници лїтнёй школы попутовали на послїдню цїлоденну екскурзію, а то до окресу Бардеёв, де навщівили прекрасный історічный Бардеёв і Бардеёвскы Купелї, враховано сканзена деревяной архітектуры Русинів. Быв то далшый незабытный день про вшыткых, также, віриме, же многы з участників прийде і на далшый річник лїтнёй школы русиньского языка і културы, або зарекомендує го своїм близкым і знамым. Увидиме на будучій рік. Єдно але порозуміли вшыткы, же таку форму школы треба орґанізовати каждорічно.