26. юна 2009 року в селї Чабины, Міджілабірьского окресу, в Домі народной творчости і ґалерії ся одбыла вернісаж выставкы знамого русиньского карікатурісты – Федора Віца, яку зорґанізовали: Сільскый уряд у Чабинах, Русиньска оброда на Словеньску (РОС), Містна орґанізація РОС у Пряшові і автор. Карікатуріста дав своїй выставцї назву Федор Віцо гуморнї і коморнї, на котрій ся представив із своїма гуморістічныма і сатірічныма творами, коморныма рисунками, мальбами і деревяныма рельєфами. Із вступным словом на выставцї ся приговорив брат автора, Мірослав Віцо з Братїславы.

Федор Віцо выставлять міджі своїма. Народив ся в Шапинцї, в родинї учітеля Федора Віца, котрый походив із села Чабины (1911 – 1982), і матери Марії, родженой Штураковой, родачкы з Крайной Быстрой (1921). Пережыв пестрый жывот школяря і штудента. Учів ся в Рошківцях, де ёго родічі учітелёвали, ходив до школы в Празї, Зволенї, скінчів основну школу в Братїславі, де пак ся учів на різьбярьскім оддїлїню Середнёй школы умелецького промыслу, штудії у якій скінчів у 1962 роцї.

Од своїх 15 років публікує свій кресленый гумор, наперед у часописї Рогач, пак ай в іншых словеньскых періодіках. Знамый є ёго серіал Дереш, якый вышов книжно в 1969 роцї, але наслїдно быв зошротованый. Автор мав довго заказане публіковати ся в централній пресї. Міг але презентовати свої рисункы в „Новім життю“, што му вытримало 10 років. Ёго серіал Ілько Сова з Баюсова мав успіх міджі народом уж і зато, або главно зато, же быв публікованый у русиньскім языку, ословлёвав людей своїма актуалныма проблемати і быв зрозумілый, трефный. По револуції 1989 серіал ся обявив у русиньскій пресї, главно в Народных новинках, а в 2001 роцї вышов ай книжно. Автор публікує в словеньскых (Roháč, Sme) і чеськых выданях (Československý denník Lidové noviny), як і в іншых. Федор Віцо редіґовав із своїм братом Мірославом двойтыжденник Bumerang, є ініціатором і орґанізатором уж 15 річника конкурузу рисованого гумору Zlatý súdok, якый ся одбывать в Пряшові. По скоро 40 роках му зачатком рока вышло доповнене выданя книжкы Дереш з підтітулом ... і нїґда інакше.

Федор Віцо ся анґажовав і як председа МО РОС у Пряшові, найновше як член выбору той орґанізації, підпорує навернутя Руського дому в Пряшові вшыткым Русиным. Знамы суть ёго театралны і режісерьскы способности. Богатый жывот (не в матеріалнім розуміню, але в духовнім) все дає такому експресівному авторови, якым є Федор Віцо, много іншпірації. Добрї, же сі єй не вхаблять про себе, але щіро ся дїлить із вшыткыма нами.