28. фебруар i 31. марeц – то суть конечны терміны на поданя приглашок тых, котры хотять штудовати русиньскый язык і літературу в комбінації з іншыма предметами на трёх факултах Пряшівской універзіты (ПУ) у Пряшові.

Занедовго тогорічны абсолвенты середнїх школ будуть собі давати приглашкы на высокошкольскы штудії, зато хочеме їх допереду поінформовати о актуалных можностях штудія русиньского языка на ПУ, причім комплексны інформації можуть здобыти на веб-сторінцї ПУ www.unipo.sk, респ. на сторінках окремых факулт ці Інштітуту русиньского языка і културы ПУ.
Также в академічнім роцї 2011/2012 ПУ отварять в бакаларьскім ступню штудія слїдуючіх 16 комбінацій з русиньскым языком і літературов:
Філозофічна факулта (приглашкы приїмать до 28. фебруара 2011):
русиньскый язык і літ. – історія, естетічна выхова, етічна выхова, філозофія, анґліцькый язык і літ., французькый язык і літ., нїмецькый язык і літ., російскый язык і літ., словацькый язык і літ., україньскый язык і літ., музичне уменя, вытварне уменя;
Факулта гуманітных і природных наук (приглашкы приїмать до 31. марца 2011):
русиньскый язык і літ. – біолоґія, ґеоґрафія, педаґоґіка;
Факулта шпорту (приглашкы приїмать до 31. марца 2011):
русиньскый язык і літ. – тїлесна выхова.

Віриме, же тоты інформації заінтересують тых, котры уважують о высокошкольскім штудію і про кого якраз русиністіка бы ся могла стати іншпіраціов.

Доц. ПгДр. Анна ПЛЇШКОВА, ПгД., ІРЯК ПУ в Пряшові