17. мая 2013 почас 14-ого засїданя Закарпатьской областной рады Закарпатьскый областный благочінный фонд «Русинська школа» роздав посланцям жадость односно державной підпоры русиньскых народных шкіл Закарпатя (каждый посланець тыж дістав дарунок в подобі книжкы о історії тых шкіл – «Русинська школа: відродження народної освіти», 2013 р.).

Імпулзом до такого кроку была як повна апатія централной, главно, містной влады до потреб русиньской освіты, підпоры народных шкіл і навчаня школярїв русиньского языка, так і вопрос як єдной з точок того засїданя – видїлити фінанції з рахунку области на підпору «загранічных Українцїв і Русинів». Але загранічны «Українцї і Русины» в рамках Европской унії дістають основну фінанчну поміч од своїх урядїв, о якій ся нашым посланцям ани не сниє! Выникать закономірный вопрос: ці не про своїх вояків до «бідных» «Русинів США» і «Українцїв Канады» акумулують фінанції посланцї? І то в тім часї, коли на Закарпатю уж десять років 23 русиньскы школы фінанцує главно Штёфан Чепа – канадьскый бізнісмен і філантроп русиньского походжіня. Русиньскы дїти чекають на серёзну одповідь народных посланцїв!